Aŭtoro: Vastalto

Korva fabo

korva faboSur printempa kampo mi trovas diversajn herbojn.
Tiu ĉi estas korva fabo [Vicia angustifolia], unu- aŭ du-jara herbo el fabacoj. Ĝi estas ordinara kampa herbo en printempa Japanio. En la japana lingvo ni nomas ĝin “karasu- no-endou (烏野豌豆)” t.e. “korva kampa fabo”, ĉar ĝia guŝo maturiĝas nigra.

Subita malvarmiĝo

Hieraŭ la maksimuma temperaturo en mia regiono estis 23 gradoj je la 3-a horo ptm. Hodiaŭ la temperaturo de la 1-a horo atm. estis 16 gradoj, kaj ĝi malaltiĝis pli kaj pli. Je la 3-a ptm. la temperaturo estis 9 gradoj.
Hieraŭa temperaturo estis tiu de majo, kaj la hodiaŭa estas tiu de februaro. Tiel rapida ŝanĝiĝo de temperaturo tute embarasas nin.

Persa veroniko

persa veronikoHodiaŭ estis tre bela vetero. Estis varme kvazaŭ en aprilo. Mi promenis for de mia domo kaj trovis kelkajn kampajn florojn de printempo.
Jen estas persa veroniko [Veronica persica], dujara herbo el skrofulariacoj, kun karakterizaj dustamenaj bluaj floroj (malpli ol 1 cm). Kvankam persa veroniko nuntempe estas ordinara herbo en printempaj vojrandoj kaj kampoj de la tuta Japanio, tamen ĝi estas naturigita planto, kiu alvenis Japanion antaŭ ĉ. 100 jaroj.

Miniaturo de gotabulo

miniaturo de gotabulo k.a.Hodiaŭ mi vizitis arkivon en mia urbo. Tie oni ekspozicias pupojn kaj miniaturojn por pupfesto (hina-macuri).
Mi trovis miniaturon de gotabulo, kies larĝo kaj longo estas ĉ. 5 cm. Sur la tabulo desegniĝis precize 19 x 19 linioj kaj metiĝis gopecoj nigraj kaj blankaj. Antaŭ la tabulo ni vidas du gopecujojn. Kaj pluse sur la kvar flankoj de la gotabulo kaj sur la gopecujoj kaj ĝiaj kovriloj pentriĝis ornamaĵo per, supozeble, orfolio kaj uruŝio (japana lako).
Mi impresiĝis pro la preciza laboraĵo.

Akismet bone gardas

Mi uzas la kromprogramon Akismet kune kun WordPress jam de 2 monatoj. Ĝi kaptas spamajn komentojn, rezervas ilin en rubujo kaj forviŝas ilin post 15 tagoj.
Ĝis hodiaŭ Akismet kaptis 173 rubaĵojn kaj nunmomente rezervas 144 rubaĵojn. Do ĉi tiu blogo ricevis proksimume 10 spamajn komentojn en unu tago. Mi ĝojas, ke ĝi bone laboras.

Etaj kronoj en mateno

lekantoj en matenoJen blankaj kronetoj troviĝas antaŭ mia domo. Matene la floroj estas duonfermitaj kvazaŭ etaj kronoj. Kaj tagmeze ili plene malfermiĝas. Tio ripetiĝas ĉiutage.
Mi ne scias ekzaktan nomon de la floro. Ŝajnas al mi, ke ĝi estas parenca speco al lekanto [= ordinara leŭkanto, Leucanthemum vulgare].

Mia tekkomputilo vivas

Pli ol 24 horojn post la paneo mia tekkomputilo nun funkcias sen problemo.
Mi serĉis en retpaĝoj kaj kolektis kelkajn informojn pri komputilaj paneoj kun la mesaĝo “STOP 0×0000007E …”. Povus esti, ke la mesaĝo aperis okaze de misfunkciado de iu pelilo (programo, kiu peras la mastrumilon kaj disponaĵon). Tio okazas ordinare, kiam oni aldonis novan disponaĵon aŭ novan programon al komputilo. Sed tiumomente mi aldonis nenion al mia komputilo. Unu retpaĝo pridubas kontraŭvirusan programon, kiu ofte renovigas sian programeron aŭtomate.

Mia tekkomputilo paneis

Hodiaŭ, kiam mi laboris antaŭ mia tekkomputilo, subite ĝi paneis. Aperis la blua ekrano anoncanta, ke la komputilo haltis por preventi seriozan difekton.
Mi malŝaltis kaj restartigis ĝin. Kiam ensalutiga meŝaĝo aperis sur la ekrano, refoje ĝi paneis. Ankoraŭfoje la blua ekrano.
Mi malŝaltis la komputilon kaj denove startigis ĝin. La rezulto estis same la blua ekrano. Legeblis la teksto “STOP 0x0000007E …” kaj “win32k.sys” (aŭ foje “vsapint.sys”).
Tiamaniere kelkfoje ripetiĝis la blua ekrano kaj restartigo. Kaj finfine mia tekkomputilo reordiĝis. Mi ne scias, kio estis malbona. Nun mi faras restaŭrkopion de necesaj dosieroj en mia tekkomputilo al ekstera durdisko.