Ekzistas TTT-robotoj, komputilaj programoj, kiuj aŭtomate kolektadas datenojn migrante en TTT. Ekzemple “Googlebot” estas la plej fama TTT-roboto. Kaj en la mondo troviĝas multege da tiaj robotoj.
Mi ekhavis la demandon, kiamaniere ĝi funkcias. En kia algoritmo ĝi migradas kaj kolektadas ĉie en TTT? Ĉu ne ekzistas tia roboto, kiu kolektas la datenojn aŭ dosierojn postulitan de la uzanto (ekz. mi)?
Aŭtoro: Vastalto
Folivespo
Mi ĝojas, ke mi fojfoje vidas novan gasteton en mia ĝardeneto. Hodiaŭa gasto similas al vespo aŭ flormuŝo. Ĉar ĝi havas longajn antenojn, ĝi apartenas ne al flormuŝoj, sed al himenopteroj. Ĉar ĝi havas dikan talion kompare kun vespo, mi konjektas, ke ĝi estas unu el folivespoj.
folivespo: komuna nomo de insektoj el la familio Tenthredinidae kaj najbaraj familioj el himenopteroj, kies larvo manĝas foliojn, kaj kies imagino havas dikan talion.
Kotonrozo — efemera hibisko
Mi trovis kotonrozon floranta en la antaŭkorto de la proksima hospitalo. Ĝiaj floroj daŭras nur unu tagon. Ĝiaj fruktoj, maturiĝinte kaj velkinte, estas facile rompeblaj. Tia efemerco tre impresas min.
kotonrozo: Hibiscus mutabilis, falfolia arbeto el malvacoj, floras de julio ĝis septembro kun grandaj rozkoloraj aŭ blankaj koroloj, kiuj malfermiĝas matene kaj ŝrumpas vespere.
Akvomelono rikoltita
Malfruiĝinte la antaŭajn, la lasta frukto de la akvomelono kreskis je ĉ. 10 cm. Hodiaŭ mia edzino senpacience plukis ĝin.
Ŝi tranĉis la frukton en kvar pecojn. La karno estis ruĝa kaj dolĉeta kun bona odoro. Ĉiuj familianoj gustumis sian porcion.
Parenteze… Akvomelono ordinare devus kreski je 20 – 30 cm.
Floroj de farbito
En ĉi tiuj kelkaj tagoj la farbitoj antaŭ mia domo ĉiumatene havas multajn florojn, kies funelforma korolo ĉiu rigardas al la ĉielo, kvazaŭ ili ricevas matenan vivenergion el la ĉielo.
La ekstera aero fariĝas friska iom post iom matene kaj vespere. Hodiaŭ haltadas la krimatizilo en mia ĉambro.
Hajko de hodiaŭ
korbelfenestro
aperta en mallumo —
ĉirpas insektoj
—
Jam venis aŭtuno, mi sentas, en nokto.
Radio Polonia ĉiam kaj ĉie
Lasta tempe mi aĉetis ico-sonregistrilon. Ĝi estas tiel malgranda kaj malpeza, ke mi povas facile kunporti ĝin en mano aŭ en poŝo aŭ ĉe brusto kun ŝnureto ĉirkaŭ kolo. Ĝi povas konektiĝi kun komputilo kaj interŝanĝi sondosierojn (*.wma kaj *.mp3).
Mi elŝutas sondosierojn de elsendoj de Radio Polonia kaj aliaj retradioj ĉe iuj retejoj (ekz. Esperanto Radio Arkivo). Kaj mi transsendas ilin el mia komputilo al la aparato. Tiamaniere nun mi aŭskultas elsendojn de Radio Plonia k.a. per la ico-registrilo.
Novaj ico-aparatoj enhavas pli grandan memorilon, kiu kapablas trakti pli grandajn sondosierojn. Mi do deziras akiri sondosierojn kun pli bona sonkvalito ol ĝis nun.
Hajko de hodiaŭ
stirakaj fruktoj
vice pendas kaj tenas
sian pluvguton
Mia programeto
Hodiaŭ mi enprofundiĝis en programado de fasado por la serĉprogramo “Hyper Estraier”. Unue mi tralegis la fontprogramon de “kukolo”, helpate de konsultlibroj pri Javaskripto kaj regulaj esprimoj. Mi devis ankaŭ legi la uzulan dokumenton de Hyper Estraier precipe pri esprimoj de serĉaj kondiĉoj.
Troviĝas unu grava diferenco inter Guglo kaj Estraier. Guglo akceptas grupigitajn AŬ-serĉvortojn en frazoserĉo. Sed Estraier ne akceptas. Tial, kiam oni volas serĉi per Estraier sinsekvon de adjektivo kaj substantivo kun fleksio, oni devas doni jenan esprimon:
“bona tago” OR “bonaj tagoj” OR “bonan tagon” OR “bonajn tagojn”
Por efektivigi tian kunfleksion mi skribis ĉi tian funkcion.
[code lang=”javascript”]
function kunfleksiu(t) {
myRE = new RegExp(“^(\S+[uao]) (\S+[ao])$”, “i”);
var paro = t.match(myRE);
if (paro) {
t = ‘”‘ + t + ‘” OR “‘ + RegExp.$1 + ‘j ‘ + RegExp.$2 +’j” OR “‘;
t = t + RegExp.$1 + ‘n ‘ + RegExp.$2 +’n” OR “‘;
t = t + RegExp.$1 + ‘jn ‘ + RegExp.$2 +’jn”‘;
}
return t;
}
[/code]
Mi lernu Javaskripton
“Kukolo“estas fasado por serĉi esperantajn vortojn en la Interreto per Guglo. Kiam oni metas substantivon, adjektivon aŭ verbon kiel serĉvorton, ĝi redonas ĉiujn fleksiitajn formojn, kiuj estas transsenditaj al Guglo. Ekzemple, enigante nur “vorto”, oni povas serĉi ankaŭ “vortoj”, “vorton” kaj “vortojn”.
Tiu ĉi tre oprtuna fasado estas priskribita per Javaskripto. Bedaŭrinde mi nur malmulte scipovas Javaskripton. Tamen mi intencas fari similan fasadon por la serĉprogramo “Hyper Estraier”. Do mi lernu Javaskripton pli detale.
Daŭrigi legi Mi lernu Javaskripton