Dum kelkaj semajnoj mi uzadis la serĉprogramon “Google Desktop” por retrovi esperantajn vortojn el dosieroj en la disko en mia komputilo. Sed ĝi ne plaĉas al mi, ĉar ĝi indeksas ne ĉiujn dosierojn en mia disko. Kiam mi serĉis la vorton “Saŭdi-Arabio”, ĝi trafis nur 3 dosierojn, kvankam 13 dosieroj kun la vorto devas ekzisti en mia disko.
Hazarde mi trovis novan serĉprogramon en retumado. Ĝi estas “Hyper Estraier” farita de japana programisto. Ĝi estas libera programo, kiu funkcias en Unikso kaj Vindozo. Ĝi konsistas el indeksilo kaj serĉilo. Kiam oni faras indekson, oni devas iom agordi la indeksilon por trakti grandajn dosierojn. Nun la serĉilo trafis ĉiujn 13 dosierojn kun “Saŭdi-Arabio” plus 6 dosierojn kun “Saudi-Arabio”.
Mi estas tre kontenta pri la rezulto. Do mi baldaŭ forviŝos “Google Desktop” el mia komputilo.
Restas unu demando. Nun ne ekzistas tia oportuna fasado pri fleksio, kian provizas “kukolo“. Ĉu mi faru programeton?
Aŭtoro: Vastalto
serpentokula papilio
Hodiaŭ mian ĝardeneton vizitis mezgranda bruna papilio kun makuloj similaj al la okuloj de serpento. Ĝi estas Mycalesis gotama, speco el satiredoj (Satyridae).
En la japana lingvo oni nomas satiredon “ĵanome-ĉou (蛇の目蝶)” t.e. “serpentokula papilio”. Ĝi estas neluksa sed impresa papilio.
Suda akalifo
Vento alportas herbajn semojn al mia ĝardeneto. Tial fojfoje mi trovas neatenditajn florojn.
Tiu ĉi elstaranta spiko estas aro de viraj floroj de suda akalifo, kiun oni klasifikas al trudherboj. Ĉe la pinto de la spiko troviĝas ia verda globeto kun haretoj. Ne ĉiuj spikoj havas tian globeton. Kio ĝi estas, mi ne scias.
suda akalifo: Acalypha australis, unujara herbo el eŭforbiacoj, kreskanta ĝis 30 – 50 cm, floras de aŭgusto ĝis oktobro. Spiko de viraj floroj elstaras el la pinto de branĉo, kaj ina floro sidas ĉe la bazo de la spiko, subtenate de folio.
Krevis akvomelono
Antaŭ ĉ. du semajnoj mi skribis pri akvomelono plantita de mia edzino. Ni atendis, ke ni povos manĝi dolĉan akvomelonon jam meze de septembro. Ĝi kreskis ĝis la grando de ĉ. 12 cm.
Sed ho, ve!
Hieraŭ matene mi trovis, ke la frukto estas larĝe krevinta. Ĝis nun la planto havis kvar fruktojn kaj ĉiuj krevis, kiam ili estis ankoraŭ malgrandaj. Estas strange. Kio estas la kaŭzo de la kreviĝo?
Hajko de hodiaŭ
ombra cedrego
super la pordolampoj —
griloj jam ĉirpas
—
En vespero griloj kaj aliaj ĉirpinsektoj komencas kanti. Aŭtuno venas.
Blanka floro de farbito
Ĉi-jare mia edzino aĉetis semojn de farbito en ĝardenkultura vendejo. Laŭ la klarigo sur la pakaĵo de la semoj, ili ne alte kreskos sed havos grandajn florojn.
Hodiaŭ matene unu el la tigoj ekhavis blankan floron, kies funelforma korolo estas fendita. Ĝia centra kavo havas helviolan koloron, kio estas tute mala kolorkombino al la ordinaraj ĉe ni. Ni ĝojas vidi la blankan farbiton maloftan ĉe ni. Sed des pli ni bedaŭras la fendiĝon de la korolo.
Plutono jam ne estas planedo
La 24-an de aŭgusto la Internacia Astronomia Unio (IAU) decidis la difinon pri “planedo” en sia ĝenerala asembleo en Pargo, Ĉeĥio.
Laŭ la nova difino “planedo” estas astro, kiu (1) estas en orbito ĉirkaŭ la Suno, (2) havas sufiĉan mason por ke ĝi formu globon per sia propra gravito, (3) forŝovis najbarulojn ĉirkaŭ sia orbito. Plutono ne kontentigas la trian kriterion, ĉar ĝia orbito kruciĝas al tiu de Neptuno. Tial Plutono nun ne estas “planedo” sed estas “nanoplanedo”.
Do nia sunsistemo havas, krom satelitoj, ok planedojn, kelkajn nanoplanedojn kaj multajn “etajn sunsistemajn korpojn”, kiuj ne havas sufiĉan mason por esti globforma per sia propra gravito.
Mi portempe bedaŭras la degradon de Plutono, sed ja respektos la decidon de la astronomoj.
Rearanĝi ĉambron
Hieraŭ kaj hodiaŭ mi purigis kaj rearanĝis mian ĉambron. Ĝis nun libroj, gazetoj, dokumentoj kaj leteroj superfluis la bretojn kaj la tablon kaj inundis sur la planko. Mi estis preskaŭ dronanta en ili.
Unue mi devis fari spaceton en la bretoj, forĵetinte dudekon da gazetoj pri komputado. Mi forĵetis ankaŭ kelke da dokumentoj kaj leteroj. Due mi klasifikis kaj ordigis la aĵojn en difinitajn lokojn. Trie mi balais kaj purigis la plankon per viŝtuko. Ho, kiel multe da polvo!
Nun la planko estas libera kaj facile trairebla, kvankam restas kelkaj papersakoj kun neordigitaj dokumentoj kaj leteroj. La tablo estas vaste uzebla. Do mi estas ĝoja kaj kontenta.
Lacerto ĉasas
En mia ĝardeneto nun floras mentoj, pederioj kaj zefirfloroj. Ĉirkaŭ tiuj floroj kolektiĝas dikkapuletoj kaj helbluaj papilietoj por suĉi nektaron. Kaj ĉasante la papilietojn, nun aktivas lacertoj (Takydromus kaj Eumeces).
Ĉi tio estas bona ekzemplo de “nutroĉeno”, ĉu ne?
Aldoni sendratan alirejon
Hodiaŭ mi aldonis sendratan alirejon al la loka reto en mia domo. La modemo lokiĝis en la teretaĝo kaj la nova aparato por sendrata aliro lokiĝos en la dua etaĝo. Mi devas konekti ilin per retkablo. Mi ne volas fari truojn en la muro aŭ en la planko. Tial mi trenis la kablon tra la teretaĝa fenestro kaj sur la ekstera muro kaj tra la duaetaĝa fenestro.
Por trairigi tra fenestro el aluminia kadro mi uzis specialan platan kablon kiu estas kovrita de aluminia lameno. Por eksterdoma instalo mi uzis pluvimunan kablon. Mi bezonis entute 5 retkablojn el 3 specoj kaj 4 pluigajn konektilojn el 2 specoj.