prosperas cujo —
tapiŝoj da rizkampo
maldense verdaj
Aŭtoro: Vastalto
Hajko de hodiaŭ
elbaniĝo nun —
disŝprucas en la gorĝon
sodakva ŝaŭmo
Hokpinta noktopapilio
Hodiaŭ mi trovis noktopapilion sidanta sur la asistanta seĝo de mia aŭto, kiam mi ekiros al la laborejo. Mi tuj reiris en la domon kaj prenis mian fotilon.
Ĝi estas speco de hokpintaj noktopapilioj t.e. drepanedoj [Drepanidae]. Konsultinte kelkajn librojn kaj retpaĝojn, mi identigis ĝin al “Oreta loochooana“. Eble oni povas nomi ĝin “okinava hokpintulo” laŭ la japana nomo “okinawa-kagiba“.
Orfiŝoj en bovlo
Hieraŭ mia patrino aĉetis 5 orfiŝojn kaj metis ilin en vitra bovlo sur la ŝu-ŝrankon ĉe la enirejo. Estas ja plezuro por ŝi teni orfiŝojn ĉi-somere. Gracie naĝantaj orfiŝoj mildigas humoron de vidantoj.
Hazarde kaj bonŝance mi trovis interesan arikolon pri la historio de orfiŝoj sur la ĉina retejo. Mi rekomendas al vi legadon.
Mi vizitis mian naskiĝurbon
Jen pejzaĝo de mia naskiĝurbo Karacu (唐津/Karatsu), kiu situas ĉe norda marbordo de Kiuŝuo, la tria plej granda insulo de Japanio.
La kastelo sur la monteto estis konstruita antaŭ 400 jaroj komence de Edo-epoko, kaj ĝia ĉefturo estis konstruita antaŭ 40 jaroj.
La nomo de Karacu aperis jam en la 6-a jarcento en historiaj dokumentoj, kiel haveno al la Korea Duoninsulo kaj al la Ĉina Kontinento.
Hajko de hodiaŭ
kiu distingas
kolorojn de pluvguto —
ja hortensio
Papilieto vizitas
Fojfoje diversaj papilioj vizitas plantojn en mia ĝardeneto.
Jen estas helblua papilieto [Zizeeria maha], specio el licenedoj [Lycaenidae], sur la floro de oksalido. Tre ordinara papilieto en mia regiono.
La larĝo de ĝiaj malfermitaj flugiloj estas ĉ. 3 cm. Ĝi havas flugilojn de helblua supraĵo kaj de nigre makulita blanka subaĵo.
Belarto en la naturo
Ĉio bela fontas el la naturo. Ĉiuj belartoj imitas la naturon.
Jen juna ĉiro de kukurbo kun hele blankaj lanugoj.
Ĝi aspektas kvazaŭ juna patrino brakumas sian bebon en iu abstrakta pentraĵo.
Hajko de hodiaŭ
malbonhumore
batas vosto de l’ kato —
cujo vigliĝas
Floroj de laktuko
Komence de aprilo mia edzino aĉetis kaj plantis tri plantidojn de laktuko. Jam fine de aprilo ni rikoltis dekon da folioj por fari salaton. Bedaŭrinde tiuj filioj estis iomete tro amaraj al niaj langoj.
Poste ni lasis la laktukojn plu kreski en la ĝardeneto. Ili kreskis tagon post tago kaj ili jam ekportas florojn. Estis al mi la unua fojo, kiam mi vidis la floron de laktuko.
laktuko: Lactuca sativa, unu- aŭ du-jara herbo el asteracoj, kiu havas diversajn variojn kultivatajn en la mondo.