Ĉu vi povas diveni, kiu estas tiu floro?
Ordinare oni manĝas ĝiajn junajn foliojn.
Ĝi estas planto el asteracoj (iamaj kompozitoj).
La respondo venos morgaŭ. 😉
Kiu estas tiu floro?
Aŭtoro: Vastalto
Kato okupis mian seĝon
Hodiaŭ mia amata kato Bii patrolis en sia teritorio matene kaj tage. Kaj vespere li ripozis en mia kabineto. Ordinare li kutimas dormi en la ondokartona skatolo sur la fenestrobreto de la ĉambro. Sed hodiaŭ li kuŝis kaj dormetis apud mia seĝo. Mi lasis lin tie, dum mi vespermanĝis en alia ĉambro.
Reveninte en la kabineton, mi trovis mian amatan katon dormetanta sur mia seĝo. Kiam mi fotis lin kun fulmlumo, li tute ne moviĝis. Li nur rigardis al mi riproĉe per la duonfermitaj okuloj.
Svelta flormuŝo
svelta flormuŝo: specio [Episyrphus balteatus] el sirfedoj, kies plenkreskula korpo estas longa je ĉ. 1 cm kun flava ventro nigre striita. Ĝia imagino (=plenkreskulo) manĝas nektaron kaj polenojn kaj ĝia larvo manĝas afidojn.
sirfedoj: familio [Syrphidae] de insektoj el la ordo de dipteroj, kies imagino ofte vizitas florojn kaj helpas polenadon. SIN. flormuŝo.
Aroganta fabrikinto
Ĉefaj du temoj de la japanaj amaskomunikiloj hodiaŭ estis la Futbala Mondpokalo kaj mortakcidento pro lifto.
La 3-an de junio en Tokio 16-jara knabo mortis premite inter la supra kadro de la koridora pordo kaj la planko de la liftkamero subite suprenirinta. Polico komencis enketon pri la akcidento kaj esploras ĉe la fabrikinto de la lifto kaj la revizi-kompanio. La fabrikkompanio deklaris, ke ĝi neniam vendis mankohavajn maŝinojn, kaj ke la akcidento okazis sub la reviziado de la alia kompanio. Tiu aroganta sinteno de la fabrikinto nun indignigas multajn homojn.
Hajko de hodiaŭ
porda lanterno —
ŝirmita de pluveroj
ha, hidrangeo
La meteologia observatorio deklaris, ke hodiaŭ komenciĝis ĉi-jara cujo (pluvsezono) en nia regiono.
Bruna pentatomo
Hodiaŭ matene mia edzino diris al mi, ke iu nekonata insekto troviĝas en la florbedo antaŭ la domo. Mi iris kaj trovis brunan pentatomon sur la folio de helianto. Ĝia korpo estis longa je ĉ. 1 cm.
Kiel kutime mi konsultis librojn kaj retpaĝojn. Ĝia scienca nomo estas Halyomorpha picus aŭ H. mista, specio el pentatomedoj. Laŭ la konsultitaj libroj ĝi suĉas sukon el junaj fruktoj de persiko, piro, persimono k.t.p. kaj damaĝas la fruktojn. Tial oni klasigas ĝin al “fiinsekto”.
Cistidio — specio el geometredoj
Unu el la avantaĝoj de mia cifereca fotilo estas zom-povo ĝis 200 mm da fokusdistanco (transkalkulite je la filmo de 35 mm). Tial mi povas foti malgrandajn insektojn, kiujn mi hazarde trovis.
Mi prenis tiun ĉi foton en la lasta sabato. Ĉar mi ne konis ĝin, mi konsultis retpaĝojn kaj trovis respondon.
Ĝi estas cistidio [Cystidia stratonice aŭ Cystidia truncangulata] el geometredoj, kies larvo moviĝas kvazaŭ du fingroj, per kiuj homo mezuras distancon.
Bulbila sedo
Antaŭ dek kelkaj jaroj mi ekhavis intereson pri plantoj, precipe pri sovaĝherboj. Estas mia plezuro trovi nekonatan de mi floron, konsulti ilustritajn librojn kaj identigi ĝin.
Sur la insuleto, kiun mi vizitis en la lasta sabato, mi trovis ĉarmajn floretojn apud vojeto. Estas bulbila sedo [Sedum bulbiferum], dujara herbo el krasulacoj, kun spatelformaj karnoriĉaj folioj kaj kun kvinnombraj flavaj floroj. El la foliakselo kreskas bulbilo, kiu falas teren kaj faras novan ĝermon.
Kiu estas tiu insekto?
Mi trovis tufarbuston de hortensio kun belaj florbuloj. Alproksimiĝinte, plie mi trovis, iu insekto simila al lokusto senmove ripozas sur la infloresko de la hortensio.
Ŝajnas al mi, ke ĝi apartenas al akridedoj [Acrididae] aŭ al tetigoniedoj [Tettigoniidae]. La longo de ĝia korpo estis 3 – 4 centimetroj. Sed ĝi havas tre malgrandajn elitrojn kiel vi vidas sur la foto. Ĉu specio el lokustoj?
Mi konsultis kelkajn librojn, sed ne povis identigi ĝin. Ĉu iu el vi legantoj povos helpi min?
Floras herakleo
Hodiaŭ mi kaj miaj familianoj vizitis insuleton 60 km norde de mia urbo. La insuleto estas konata pro tio, ke oni elfosis oran sigelilon de antikva epoko.
Tie mi trovis impresan planton kun infloresko de blankaj floretoj. Mi fotis ilin kaj, reveninte hejmen, konsultis librojn kaj retojn.
Ĝi estas herakleo, pli detale Heracleum lanatum Michaux subsp. moellendorffii (Hance) Hara, el apiacoj. Ĝi estas plurjara herbo 1 – 2 metrojn alta, kun plume kunmetitaj folioj el 3 – 7 folieroj. Laŭ la konsultitaj libroj, junaj folioj de la subspecio moellendorffii estas manĝeblaj, kvankam PIV 2005 difinas, ke herakleo estas “venena” herbo.