virino vokas —
semitaj farbitoj jen
ĝermis tri el kvin
Aŭtoro: Vastalto
Malsaniga sanekzameno
Hodiaŭ estis jara sanekzameno en mia laborejo. Ĝi ne plaĉas al mi, ĉar mi devas havi radioskopion de stomako.
Unue mi devas engluti botelon da baria kaĉo, blanka ŝlimsimila suspensiaĵo de baria sulfato.
Due mi devas multfoje turniĝi kaj renversiĝi sur fera lito moviĝanta.
Kaj trie mi devas eligi la barian kaĉon per laksigilo, tial post la sanekzameno mi devas kuri al necesejo plurfoje.
Hodiaŭ ja estis laciga tago. Ankaŭ miaj kolegoj plendas pri la malsaniga sanekzameno.
Bone taŭgas OpenOffice.org 2.0.2
Kiel jam skribite, mi instalis en mia komputilo la integran programaron OpenOffice.org (opn’ofis’og). Mi startigis la tabelprogramon Calc (kalk) kaj legigis al ĝi la dosieron faritan de Microsoft Excel (mikrosoft eksel).
Al mia ĝoja surprizo la tabelo sur la ekrano aspektis preskaŭ same al la originalo. La vicoaltoj iomete pli altas ol la originalo, kaj la presita tabelo eliĝis en la kroman paĝon. Tio ĉi estas facile solvita per modifado de vicoaltoj.
Pri la linistiloj de ĉela bordero Calc ne disponas punktolinion, kaj ĝi transformas punktolinion en la plej maldikan (=0.05 pt (punkto)) solidan linion. Tiuj plej maldikaj linioj estas videblaj sur ekrano, sed ili ofte ne presiĝis sur papero (ĉu cimo?). Tial mi ŝanĝis ilin per la solidaj linioj de 0.50 pt., kiuj presiĝas bonorde.
La tutaj malfacilaĵoj, kiujn mi renkontis en mia laboro, estis nur du (!) supre diritaj. Ĉiuj matematikaj formuloj en la ĉeloj bone funkciis. Enigo kaj traktado de la japana lingvo (plurbajtaj literoj) iris sen problemo. Nun mi juĝas, ke la tabelprogramo Calc (supozeble ankaŭ OpenOffice.org) taŭgas por ordinaraj uzoj anstataŭ Excel (ankaŭ MS Office).
Koran dankon al la programistoj kaj la kunlaborantoj de OpenOffice.org.
Floroj de terpomo
En la angulo de mia ĝardeneto troviĝas fosaĵo, en kiun ni forĵetas tranĉrubojn de legomoj. Tial de tempo al tempo, terpomoj, kukurboj k.a. elkreskas el la fosaĵo.
Jen stelformaj floroj kun kvin helviolaj petaloj kaj kun okulfrape elstarantaj flavaj anteroj (polensakoj). Tiuj estas floroj de terpomo [Solanum tuberosum]. Laŭ konsultita libro, el la floro malofte fariĝos malgranda frukto simila al tomato. Do mi esperis vidi la maloftan frukton en venontaj tagoj.
Sed ho ve! Jam en la sekva tago mia edzino eltiris ilin kaj rikoltis etajn tuberojn. Ŝi ĝojas preninte dekon da terpometoj per la ambaŭ manoj.
Mi provas la programaron OpenOffice.org
En mia laborejo oni liveris certan dosieron en Microsoft Excel (mikrosoft eksel). Koncerne tiun taskon ĝis nun mi laboris per globkrajono, gluaĵo kaj tondilo. 😉
Lastatempe mi aŭdis la famon pri OpenOffice.org (opn’ofis’og), libera (senpaga) integra programaro por oficejaj laboroj, kiu estas kongrua kun la programaro Microsoft Office (mikrosoft ofis). Ĝia tabelprogramo Calc (kalk) laŭdire povas lerte prilabori dosieron de Excel.
Nun mi elŝutis la dosieron de OpenOffice.org kaj instalis ĝin en mia komputilo. Ĉu mi sukcesos fini la taskon per Calc? Mi raportos pli poste.
Foliskarabo vizitis mian ĝardeneton
Hodiaŭ mi trovis foliskarabon sur folio de la kukurbo, kiu ekkreskas en mia ĝardeneto. Ĝi havas glaceajn kaj flavruĝajn elitrojn malmolajn. Ĝia korpo estas longa je ĉ. unu centimetro.
Konsultinte librojn kaj retpaĝojn, mi identigis ĝin kun Aulacophora femoralis, speco de foliskaraboj. Mi provizore nomu ĝin “kukurba foliskarabo” laŭ la japana nomo Urihamusi.
kukurba foliskarabo: specio Aulacophora femoralis el krizomeledoj (foliskaraboj) de koleopteroj, kiu kun flavruĝaj elitroj manĝas foliojn de kukurbacoj.
Hazardaj paĝoj de esperanta Vikipedio
Mi alklakis sinsekve dek-foje la “hazardan paĝon” de esperanta Vikipedio. Jen la rezulto:
1. Marako: muzikilo de Ameriko.
2. Silla: antikva regno de Koreio.
3. S. Colum Gilfillan: usona esperantisto.
4. Apalaĉio: geografia kaj kultura parto de Usono.
5. Villalba: komunumo de Italio.
6. 6-a de junio: ?
7. Fatvo: islama juĝa ekspertizo.
8. 1053: la jaro 1053 post Kristo.
9. Osnabrück: germana urbo.
10. Mondelingua: planlingvo
Nur du artikoloj pri marako kaj fatvo estas legindaj, sed la aliaj estas simplaj notoj ne indaj je la nomo de “enciklopedio”. Mi respektas la laborojn de entuziasmaj vikipediistoj. Kaj mi bedaŭras, ke kelkaj robotoj amase produktas ne indajn artikolojn.
Badmintono ne troviĝas en PIV
Leginte la artikolon de Eriketo, mi rimarkis, ke PIV 2005 ankoraŭ ne enhavas la vorton “badmintono“, kvankam ĝi jam de longe enhavas “volano“-n.
Do mi provu fari suplementon al PIV 2005 pri badmintono. 🙂
badmintono: Sporto, en kiu konkursantoj transbatas volanon per rakedo trans la reto inter si. SIN. volanludo.
Vikipedio kaj Reta Vortaro jam enhavas “badmintono”-n. Oni povas kompari la difinojn.
Ĝermfolioj de farbito
Antaŭ semajno mia edzino semis farbiton en florbedo antaŭ la domo. Kelkaj el la semoj jam ĝermis. Ĉiu havas du simetriajn ĝermfoliojn (kotiledonojn).
Mi (kaj ankaŭ multaj japanoj) lernis plantojn en la elementa lernejo, observante kreskadon de farbito. Farbito estis tre populara lernomaterialo de naturscienco en elementaj lernejoj.
farbito: specio Ipomoea nil el konvolvulacoj, unujara herbo volviĝanta, pororname kultivata pro la belaj floroj.
Florburĝonas hortensio
Jen florburĝonoj de hortensio [Hydrangea macrophylla]. Aro da ĉarmaj verdaj globetoj. Ili preparas sin por la venonta sezono. Kiam hortensioj plenfloros, tiam venos cujo, frusomera pluvsezono en Japanio.