postpluvaj gutoj
tenas en si matenon —
verdaj folioj
Post pluvo
Aŭtoro: Vastalto
Kato amas ŝuon
Verdire mia amata kato Bii estas fetiĉisto al miaj ŝuoj. Jen la foto pruvas tion. Li brakumas ravite mian ledŝuon. Li ronronadas kaj eĉ lekas la ŝuon ripetante. Mi observis tian konduton multfoje.
Laŭ la etikedo tiu ĉi ŝuo estas farita el ledo de kanguruo. Ĉu tio estas la kialo, ke mia kato amas miajn ŝuojn eksterordinare? Mi ne estas certa, tamen mi supozas tiel.
La modifado finiĝis
La hieraŭ anoncita modifado finiĝis kun kelkfojaj cerbumadoj. Nun ĉiu paĝo estas eldonita en php-dosiero. Kaj arkivoj en kategorioj estas dividitaj po 20 artikoloj en ĉiu paĝo.
En la modifado mi havis kelkajn neatenditajn problemojn.
1. Unu skribaĵo de la konsultita libro enhavis eraron.
2. Sen eksplica ordono Movable Type eligas php-dosieron sen plenum-permeso.
3. La gastiganta komputilo de mia blogo permesas php-funkcioadon en la dosierujo kun la atingopermeso 755, sed ne en la dosierujo kun 777.
Kaj la kvara problemo koncernas ne mian blogon sed la retejon “e-planedo“, kie aperas ĉiutage nova artikolo de mia blogo. Hodiaŭ tie aperis deko da malnovaj artikoloj el mia blogo sub la hodiaŭa dato. Tio eble ĝenas legantojn de e-planedo. Sed mi ne povas diveni la kialon. Mi petas indulgon de la legantoj.
Anonco — modifo de tiu ĉi blog-sistemo
Mi planas plibonigi alireblecon de tiu ĉi blogo. Arkivoj de kelkaj kategorioj pli kaj pli grandiĝas kaj peziĝas por foliumi. Estos pli oportune dividi arkivon en kelkajn negrandajn paĝojn.
Morgaŭ mi faros ĝeneralan modifon de la sistemo Movable Type. Ĝi influos ĉiujn dosierojn de tiu ĉi blogo. Povus okazi neatendita akcidento. Mi esperas, ke la modifado finiĝos sukcese.
Ĝis nun la programo eligis html-dosieron por ĉiu artikolo. De morgaŭ ĝi eligos php-dosieron anstataŭe. Tamen la fasado de tiu ĉi blogo preskaŭ ne ŝanĝiĝos. Ordinaraj retumantoj ne rimarkos la modifon.
Ĝisdatigo de Vikipedio en mia komputilo
Hodiaŭ mi provas ĝisdatigi Vikipedion en mia komputilo. Kiam mi instalis Vikipedion antaŭe, mi uzis la php-programon “importDump.php” kaj bezonis ĉ. 5 horojn (aŭ pli — mi ne scias precize, ĉar mi dormis).
Ĉi-foje mi uzas “xml2sql.exe” kaj “mysqlimport.exe“. Onidire tiuj programoj mallongigas enportadon de datumoj al la datumbazo. Sed nun mi dubas tiun aserton, ĉar prilaboro de 6 procentoj de la datumoj jam bezonas 30 minutojn. Do la tuta prilaborado bezonos ĉ. 7 horojn! Ho ve!
Sisirinkio — naturigita planto
Mi trovis sisirinkiojn florantaj malantaŭ la ĉirkaŭmuro de la hospitalo. Ili altas 10 – 20 cm. Malgrandaj floroj kun diametro de ĉ. 1 cm. Ses radiaj petaloj helviolaj kun malhelviolaj strioj. Estas la specio Sisyrinchium atlanticum.
Mi amas ĝian etan sed streĉitan figuron.
Laŭ konsultita libro ĝi estas naturigita planto enportita en Japanion el Norda Ameriko ĉirkaŭ en 1887.
sisirinkio: genro Sisyrinchium el iridacoj, plurjaraj herboj originantaj el Norda Ameriko.
Hajko de hodiaŭ
preterpasante
mi al vi enmanigis —
papavofloroj
Rododendroj ekfloras
Antaŭ mia domo estas maso de rododendroj. Nun ili ekportas rozkolorajn florojn. La floro estas karakteriza per korolo funelforma kaj kvin-duonfendita.
rododendro: specio Rhododendron indicum el erikacoj, duone daŭrafolia arbusto, kiu ofte ornamas ĝardenon en okcidenta Japanio.
Kompatinda hotujnio
Nun ĉirkaŭ mia domo floras hotujnioj. La herboj odoras forte, kiam oni piedpremas ĝin. Multaj homoj ne preferas ĝian odoron. Ankaŭ mia edzino ne ŝatas hotujniojn pro la odoro.
En Japanio jam de malnova epoko oni uzadis hotujnion kiel medicinan herbon. Sed nuntempe ĝia uzado estas malofta sub la prospero de la okcidenta (eŭropa) medicino.
hotujnio: specio Houttuynia cordata, multjara herbo el saŭruracoj de piperaloj.
Floras la melio
Lastmonate mi skribis pri novaj folioj de melio. Temas pri la arbo, kiu staras en la tereno de la hospitalo proksima de mia domo.
Nun la melio portas paniklojn da helviolaj 5-petalaj floretoj. Ĝi ne estas tiel okulfrape bela, sed konvenas al frusomera freŝa atmosfero.
[Melia azedarach L.]