En la lasta januaro mi skribis pri sazanko. Jam antaŭe forfalis ĝiaj floroj.
Hodiaŭ mi trovis, ke la sazanko kreskigas junajn foliojn helverdajn. Nun venis la sezono de junaj folioj. Tie kaj ĉi tie mi vidas freŝverdajn foliojn. Printempo jam pasis sian kulminon. Kaj somero proksimiĝas iom post iom kun certaj antaŭsignoj.
sazanko: specio [Camellia sasanqua] el teacoj.
kato dormanta
pli plate sur la planko —
pluvo printempa
***
Hodiaŭ pluvadis dum la tuta tago. Mia amata kato Bii ne povis iri eksteren.
Nun floras arbeta peonio [Paeonia suffruticosa], kiu estas la plej pompa floro en mia ĝardeneto. La ruĝpurpura floro grandas ĉirkaŭ 20 centimetrojn kaj imponas super la aliaj floroj.
Arbeta peonio, japanlingve “botan“(牡丹), estas kultivata pororname jam de 1000 jaroj en Japanio. Laŭ libroj ĝi originas el Ĉinio, kie oni utiligis ĝian radikon kiel medikamenton jam antaŭ 2000 jaroj.
Certa elektronika fabrikanto inventis aparaton, kiu malebligas al televidantoj ŝanĝi kanalon dum la elsendo de reklamoj, aŭ kiu malebligas rapidigi videoregistrilon dum la reproduktado de reklamoj.
La aparato do devigas spektantojn nepre rigardi reklamojn. Se ili ne volas rigardi reklamojn, ili devas pagi al la elsendokompanio.
Kia terura aparato! Ĝi estas la inventaĵo de Diablo! Mi ne aĉetos televidilon nek videoregistrilon kun tia aparataĉo.
En la japana tradicia hajko ekzistas la sezonvorto “kame naku” (testudo kantas) por printempo. Fakto estas, ke la testudoj ne kantas. Ĝi estas fikcio de hajkistoj.
testudo kantas —
tomboŝtonoj silentaj
ĉe la lageto
En la lasta dimanĉo mi vizitis tomboparkon (komuna tombejo), kie staras dek mil tomboŝtonojn sur malkruta montodeklivo.
Tio ĉi estas mia unua vizito al tia granda tombejo. En la tombejo oni akceptas novajn tombojn sendistinge pri religioj kaj sektoj. Mi certe impresiĝis, propraokule vidante, ke kristanaj tomboj kaj budhanaj tomboj intermikse staras.
Nun en mia ĝardeneto ekfloras tre malgrandaj floroj de karolina geranio [Geranium carolinianum]. Blanka aŭ pale purpura 5-petala floreto kun bluaj strioj. La flora diametro estas 8 – 9 milimetroj.
“Karolino” estas ŝtatnomo de Usono. Onidire ĝi estis enportita en Japanion miksite en gresoj el Usono antaŭ la dua mondmilito.
petaloj disen,
kreskas folioj verdaj —
Zamenhof falis
En la 14-a de aprilo, 1917, mortis Lazaro Ludoviko Zamenhof en sia 57-a jaro. En la tradicia japana hajko oni fojfoje versas memore al la mortotago de respektataj antaŭuloj.
ĝardenaj herboj
nun eligas varmeton —
printempa pluvo
En mia ĝardeneto nun floras diversaj floroj. Kaj la florojn vizitas diversaj insektoj. Tial ankaŭ lacertoj vizitas.
Jen vidu la foton. Takidromo [Takydromus tachydromoides] sin kaŝas inter kreskintaj herboj. Kion rigardas ĝiaj okuloj? Ĉu ĉasaĵon?
Takidromo: genro el lacertedoj. Takydromus tachydromoides estas propra specio ordinara en Japanio. Ĝi havas korpon longan je ĉ. 20 cm kun bruna dorso kaj tre longa maldika vosto.