Aŭtoro: Vastalto

Averto pri trudkomentoj

Lastatempe tiu ĉi blogo ricevis serion da trudkomentoj en la angla lingvo. La trudistoj uzas nefibeblajn retadresojn ekz. “gajnimonon.info”. Ĝi estas metita ĉe la nomo de afiŝinto.
Mi avertas la legantojn, ke vi ne alklaku tiun substrekitan nomon. Mi suspektas, ke la trudistoj intencas artifike ŝteli viajn privatajn informojn el via komputilo, kiam vi alklakas la nomon ligitan al nefidebla retejo.
Nun mi iom modifis kondiĉon de MovableType por pli efike preventi trudkomentojn. Mi esperas, ke publikiĝos malpli da trudkomentoj.

Flava sablo

Mi trovis artikolon en ĵurnalo, kiu raportas, ke ĉi-jare okazas pli multe da “flavaj sabloj” en Ĉinio. Laŭ la artikolo, tion kaŭzas malmulteco de pluvakvo en Interna Mongolio, kie disvolviĝas dezertiĝo.
Flava sablo estas natura fenomeno, ke ĉefe en la norda Ĉinio amaso da fajnaj sableroj blovlevita alten en la aero disflugas per vento kaj malrapide faladas kovrante la ĉielon kiel flava nebulo.
La flava sablo fojfoje atingas Japanion ĉefe en printempo. En tiuj ĉi februaro kaj marto kelkfoje falis la flava sablo ankaŭ en mia regiono. Tiam mia aŭto plene kovriĝis per fajnaj sableroj ĉe la tegmento, la fenestroj kaj la kapoto. Ĉiufoje mi devis pene purigi la aŭton.

Mokamarona rulkuko

mokamarono

Mi amas manĝi dolĉaĵojn. Hodiaŭ mi kaj mia edzino vizitis dolĉaĵejon en la urbo, kie ni aĉetis kelkajn manĵuojn.
En angulo de la butiko oni metis kelkajn tabletojn kaj seĝojn. Tie butikumantoj povas libere kaj senpage trinki kafon aŭ teon. Ni fojfoje trinkas kafon kaj teon kun kukoj aĉetitaj en la butiko.
Jen mokamarona rulkuko en la foto tre plaĉas al mi. Bongusta estas la marona kremo gustigita per kafesenco kaj guteto da likvoro.
manĵuo: japana vaporumita bulko, havanta interne ruĝajn fabojn mole kuiritajn kun sukero. (PIV2005)

Mariskarabo — hajko de hodiaŭ

kokcinelo

    mariskarabo
    tra inter herba valo
    glite rapidas

mariskarabo: alinomo de kokcinelo [familio Coccinellidae], insekto el la ordo de koleopteroj. Jen la foto montras sepmakulan kokcinelon [Coccinella septempunctata]. Ĝi nomiĝas “skarabo de Sankta Mario” en kelkaj eŭropaj lingvoj. En la japana lingvo ĝi nomiĝas “sun-insekto (tentou-musi), ĉar ĝi grimpas ĝis la pinto de branĉo kaj ekflugas cele al la suno.

Marakvo de la Pacifiko pli acidiĝas

Antaŭe mi afiŝis la artikoleton “Konkoj solviĝos pro mara acidiĝo” en ĉi tiu blogo. Nun kolektitaj datenoj konfirmas, ke la Pacifika Oceano fariĝas pli acida.
Usonaj sciencistoj kolektis specimenojn de marakvo en diversaj lokoj de la Norda kaj Suda Pacifikoj en tiuj ĉi februaro kaj marto. La analizo de la specimenoj montris, ke pH (hidrogena potenco) de la marakvo malkreskis je 0.025 unuoj kompare kun tiu de antaŭ 15 jaroj, kaj ke neorganika karbono (ekz. karbondioksido) solvita en la surfaca marakvo kreskis 15 µmol/kg (mikromoloj en unu kilogramo).
La sciencistoj asertas, ke la malkresko de pH pruvas mara acidiĝo de la Pacifiko. Ĉi tiujn dramajn ŝanĝojn kaŭzis plejparte homdevena karbondioksido ensolviĝinta en la oceanon dum la lastaj 15 jaroj.
Kio do sekvos la maran acidiĝon? Katastrofo al konkoj? Malsatmorto al balenoj? Kaj poste?

Sakuro plenfloras

sakuro plenfloras

La sakuro en la proksima hospitalo nun plenfloras. Jen la foto montras, ke ĉiu branĉo portas grapolon da floroj malfermaj.
Jam de antaŭ semajno sakuroj plenfloras tie kaj ĉi tie en mia urbo. Mi rimarkis, ke tiu ĉi sakuro en la hospitalo plenfloras pli malfrue ol aliaj sakuroj. La floroj ankoraŭ forte alteniĝas al branĉoj, kaj nur malmultaj petaloj disiĝas de branĉoj. La plenflorado daŭros kelkajn tagojn.

Maraglo mortis pro olepoluado

La Japana Ministrejo pri Medio komunikis, ke la haliaeto [Haliaeetus pelagicus], kies kadavro troviĝis en marbordo de Hokajdo (norda Japanio) la 29-an de marto, mortis pro manĝo de marbirdoj poluitaj per peza oleo.
En la lasta marto pli ol 5000 kadavroj de marbirdoj albordiĝis kovritaj de peza oleo. Oni konjektas, ke la mortinta maraglo (haliaeto) manĝis tiujn olepoluitajn marbirdojn, kio kaŭzis gravan perturbon ĉe la digesta organo kaj difektiĝon ĉe la tuta internaĵo.
En Japanio haliaetoj [Haliaeetus pelagicus] troviĝas nur en Hokajdo, kaj klasiĝas al la “natura monumento”. Ili grupiĝas ankaŭ en la “vundiĝema specio” laŭ la “Ruĝa Libro pri Japanaj Sovaĝaj Vivaĵoj”.