ridet-okule
jen staras ŝtona budho —
printempaj blovoj
Aŭtoro: Vastalto
Ankaŭ flava narciso floras
Hieraŭ mi prezentis tute blankan narcison. Hodiaŭ do tute flavan narcison. Ankaŭ tiu ĉi floras en mia ĝardeneto.
Tiun ĉi floron karakterizas mezgranda taso-forma kromkorolo. La pedunklo portas nur unu floron.
Mi pensas, ke ĝi estas Narcissus incomparabilis, t.e. “senkompara narciso”. En la japana lingvo oni nomas ĝin taihai-suisen, t.e. “grandpokala narciso”.
Novaj narcisoj en la ĝardeno
Nun en mia ĝardeneto floras multaj narcisoj, pli detale, japanaj tazetoj. Antaŭe mi prezentis varion de tazeto kun flava kromkorolo.
Jen la foto montras alian varion (aŭ formon ?) de tazeto. Ĝia floro konsistas el 6 blankaj petaloj (perianteroj) kaj blanka kromkorolo en la mezo. Bedaŭrinde mi ne scias, al kiu vario aŭ al kiu formo ĝi apartenas.
Tiu ĉi vario estas tre plaĉa al mi pro la tute blanka pureco.
Filmo pri karmemora pasinta epoko
Hodiaŭ mi kaj mia edzino vizitis urban kulturcentron, kie oni prezentis la kinofilmon “Por Ĉiam — la Vespersuna Strato”. Ĝi estas drama filmo el la komiksa originalo de SAIGAN Ryoohei “3-tyoome no yuuhi“.
Ĝi pentras la vivon de simplaj civiluloj en popola kvartalo de Tokio ĉirkaŭ en la jara 1958. Nur 13 jarojn poste de la malvenko de la Dua Mondmilito, preskaŭ ĉiuj estis malriĉaj, sed ĉiuj vivis kun espero por estonteco. La Tokia Turo en konstruado simbolas la epokon.
La ĉiutagaĵoj pentritaj en la filmo kare rememorigas nin pri la pasintaj tagoj, kaj la rektanima vivmaniero de la tiamaj homoj vekas emocion en ni.
Brasiko kreskas el rubejo
En la angulo de mia ĝardeneto mi fosis truon, en kiun ni forĵetadis neuzeblajn legomrubojn. La forĵetitajn legomojn malkomponas bakterioj kaj fungoj en la grundo. Poste el la forĵetaĵoj fariĝas bona kompoŝto.
Nun el la rubejo elkreskas ia brasiko [genro Brassica], kaj ĝi portas tipajn florojn de krucifero. Bedaŭrinde mi ne povas diveni, kiu specio de brasiko ĝi estas. Mi daŭre observadu ĝin.
Hajko de hodiaŭ
kato promena
ankoraŭ ne revenas —
tago jam longas
Mi rimarkis, ke luma tago fariĝas pli longa, kaj ke vespera krepusko fariĝas pli malfrua. Jes, certe venis printempo.
Enira ekzameno de superaj mezlernejoj
Marto estas monato por la enira ekzameno de superaj mezlernejoj, kiun defias 14-jaraj mezlernejanoj en la tuta Japanio.
Hodiaŭ en mia gubernio okazis la enira ekzameno kaj defiis 31 000 (tridek unu mil) kandidatoj. Ili ekzameniĝis pri kvin objektoj: la japana lingvo (literaturo k.a.), socialaj aferoj (historio, geografio k.a.), matematiko, naturscienco kaj la angla lingvo. Ĉiuj estas paperaj ekzamenoj.
Morgaŭ ili havos mallongan buŝan ekzamenon. Post semajno publikiĝos la rezulto.
Peonio burĝonas
Estas printempo. La aero estas iom post iom pli varmeta. La naturo montras atestaĵojn de printempo tie kaj ĉi tie.
Jen la foto montras burĝonon de la peonio [Paeonia suffruticosa], kiu staras dum jaroj en mia ĝardneto.
Mi ne scias, kiu diris, ke la eroto estas origino de la vivo. Tamen la formo kaj la koloro de la peonia burĝono kvazaŭ dirus al mi, ke la vivo estas esenco de la eroto.
Plano por Elektronika Biblioteko
Kredeble oni jam multe spertis utilecon de elektronikaj tekstoj kompare al paperaj libroj. Nun sur la Interreto troviĝas multe da esperantaj tekstoj eltiritaj el paperaj originaloj.
Sed la kvanto de la surretaj esperantaj tekstoj estas malpli multaj ol paperaj esperantaj tekstoj, mi pensas. Por ke Esperanto estos agnoskita en la denuna mondo, ni devas plimultigi bonkvalitajn esperantajn tekstojn publike alireblajn per la Interreto.
Mi nun planas enkomputiligi esperantajn librojn, kiuj eldoniĝis jam de longe en Japanio. Por fari tion, unue mi devas kolekti kunlaborantojn kaj due permesojn de la aŭtoroj. Mi antaŭvidas, ke la unuaj fruktoj de tiu ĉi plano aperos post kelkaj jaroj.
Hajko de hodiaŭ
panon kaj lakton
kaj aldone donuton —
vento varmeta
Ankaŭ hodiaŭ estis bela vetero. Posttagmeze mi eliris promeni kaj aĉetis kelkajn manĝaĵojn ĉe proksima krakbutiko.
donuto : ringoforma pasto fritita kaj sukerglazurita. = pastoringo.