Aŭtoro: Vastalto

La deka planedo de la Sunsistemo?

Kelkaj ĵurnaloj raportas pri la artikolo de la brita scienca gazeto “Nature“.

En la lastjara julio NASA (la Nacia Aeronaŭtika kaj Spaca Administracio de Usono) publikigis eltrovon de la astro, kiu povas esti la deka planedo de la Sunsistemo.

Germana esplorteamo el sia observado konkludis, ke la diametro de la astro estas ĉ. 3 000 km, tio estas, 1,3-oble pli granda ol tiu de Pluto (ĉ. 2 300 km). La esploristoj asertas, ke la konkludo subtenas la dekan planedon.

La astro nun situas en la distanco de ĉ. 14 500 000 000 km (dek kvar miliardoj kaj kvincent milionoj da kilometroj) de Suno, pli ol duoble malproksima kompare al Pluto.

Varmaj tagoj en vintromezo

Hieraŭ kaj hodiaŭ estis tre varmaj kompare al la ordinaraj vintraj tagoj. Hieraŭ en mia regiono la maksimuma temperaturo estis 13,5 gradoj celsiaj kaj la minimuma temperaturo 9,0 gradoj celsiaj.

Hodiaŭ la maksimuma 17,6 gradoj kaj la minimuma 10,3 gradoj. Estis varmeco de aprilo! Domoj kaj kampoj kuŝis en brumo. Jam printempa pajzaĝo. Mi ŝvitis fojfoje en vintra vesto.

Mia komputilo

mia tekokomputilo

Jen estas mia tekokomputilo, Panasonic CF-W2. Procesoro: Intel Pentium M 1 GHz(gigaherco). Ĉefmemoro: 760 MB(megabajtoj). Durdisko: 60 GB(gigabajtoj). Mastruma sistemo: Windows XP Professional SP2.

Mi aĉetis ĝin antaŭ du jaroj. Ĝi estas malpeza je ĉ. 1,5 kg(kilogramoj), vere facile portebla kaj en la hejmo kaj en la laborejo. Ĝi tre plaĉas al mi.

Sed nun mi havas kelkajn problemojn pri mia komputilo. Unu estas manko de libera memoro en la durdisko. Ĉar mi konservas multajn programojn kaj datumojn en du jaroj, nun restas 5 GB da libera memoro en la durdisko. Tio ĉi estas ne tre granda spaco por provizoraj uzoj de memoro fare de samtempe kurantaj programoj. Nu, kion mi faru?

Enira ekzameno de japanaj universitatoj

En la 21-a kaj 22-a de tiu ĉi januaro okazis la komuna enira ekzameno por universitataj kandidatoj. La komuna ekzameno okazas unu fojon jare en januaro. Ĉi-jare ĉ. 550 000 junuloj ricevis la ekzamenon.

En Japanio troviĝas tri specoj de universitato laŭ ĝia fondinto: ŝtata, municipa kaj privata universitatoj. La komunan ekzamenon utiligas ĉiuj ŝtataj kaj municipaj universitatoj kaj plimulto de privataj universitatoj. Parto de privataj universitatoj donas proprajn enirajn ekzamenojn.
Daŭrigi legi Enira ekzameno de japanaj universitatoj

250-a datreveno de la naskiĝo de Mozarto

Volfgang Amadeus Mozarto [Wolfgang Amadeus Mozart] naskiĝis en la 27-a de januaro 1756. Hodiaŭ estas la 250-a datreveno de lia naskiĝo.

Mozarto estas unu el la plej popularaj komponistoj de la eŭropa klasika muziko. En sia tuta vivo li verkis ĉ. 700 muzikaĵojn.

Mi havas kelkajn kompaktodiskojn de liaj verkoj. La korda terceto “Divertimento en E bemola maĵora, K.563″ estas tre plaĉa distraĵo al mi. Nun aŭdante ĝin kiel fonmuziko, mi klavas tiun ĉi artikolon.

Ilekso kun ruĝaj fruktetoj

ilekso kun ruĝaj fruktetoj

Kial estas tiel, mi ne scias. Tamen estas fakto, ke en vintro ofte troviĝas arboj portantaj ruĝajn fruktetojn.

Ileksoj staras vice antaŭ la parkejo de la proksima hospitalo. Nun ankaŭ ili portas ruĝajn fruktetojn. Jen la foto montras ilekson pritonditan antaŭ ĉ. du semajnoj.

Mi supozas, ke ĝi estas “Ilex integra” (motinoki モチノキ en la japana), ordinara ilekso en Japanio. PIV2005 donas la nomon “ordinara ilekso” al “Ilex aquifolium” (seiyouhiiragi セイヨウヒイラギ en la japana), kiu tamen estas tute ne ordinara en Japanio.