ekzamenotoj
hastas tra la pordego —
neĝo senĉese
Hieraŭ kaj antaŭhieraŭ okazis la komuna enira ekzameno por universitataj kandidatoj. Multaj junuloj ekzameniĝis.
Aŭtoro: Vastalto
Mesaĝo el Hiroŝimo por Virina Tago 2006 [Plusendo]
Kelkaj japanaj esperantistoj nun klopodas dissendi la mesaĝon por la Internacia Virina Tago 2006 kaj kolekti respondajn mesaĝojn el la tuta mondo pere de esperanto. Jam ilin atingis respondojn el ĉirkaŭ 20 landoj. Sed ili ankoraŭ ne kolektis 100 respondojn.
Bonvole legu la sekvan mesaĝon. Se vi ekhavas intereson pri la temo, sendu vian mesaĝon al la sube indikita retadreso. La limdato estas la 19-a de februaro.
[En la antaŭa parto de la teksto ili petas transdonon de la mesaĝo al vialandaj virinaj grupoj. Sed, se vi ne havas tian kontakton, do vi povas sendi vian propran respondan mesaĝon.]
Daŭrigi legi Mesaĝo el Hiroŝimo por Virina Tago 2006 [Plusendo]
Ardizio — ĉarmas ruĝaj fruktetoj
Nun ardizio antaŭ la domo portas ĉarmajn ruĝajn fruktetojn.
Oni nomas ĝin “manrjoo (万両)” en la japana lingvo. Manrjoo signifas dekmil rjoojn. Rjoo estas malnova ora monero en Japanio.
ardizio: Specio [Ardisia crenata] el mirsenacoj [Myrsinaceae] el la ordo primolaloj [Primulales]. Daŭrafolia arbedo kultivata pororname.
La Umejo — Gemo en Interreto
Mi trovis belan gemon en Interreto, “La Umejo“.
Ĝi estas retejo de hajgao aŭ hajkobildo. Ĉiu verko konsistas el eleganta bildo kaj ŝatata hajko (en Esperanto kaj en la angla). Ĝia rafinita prezentado tre plaĉas al mi.
Nun la retejo enhavas kvar verkojn. Mi esperas, ke de nun aldoniĝos pli da verkoj. Mi rekomendas al ĉiuj poezi-amantoj viziti la retejon.
Artefarita malsanigo je BSE
Laŭ la japana gazetaro, la Hokajda Esplor-Centrejo pri Bredado sukcesis artefarite malsanigi 3 bovinojn je BSE (Bova Spongoforma Encefalopatio, aŭ konata kiel malsano de “freneza bovino”) per kelkfoja inokulado de BSE-prionoj en la cerboj de 14 bovinoj.
Oni atendas, ke regula analizado de sango kaj urino de la infektitaj bovinoj utilos por firmigi la diagnozon pri BSE dum la vivo.
Nenormalaĵo en la Tokia Borso
Hodiaŭ posttagmeze oni ĉesigis vendon kaj aĉeton de ĉiuj akcioj en la Tokia Borso.
La kaŭzo estis, onidire, ke la nombro de la transakcioj superis 4 milionojn, kio malfaciligis funkciadon de la komputilsistemon de la borso.
Koncernatoj prenas tiun ĉi nenormalaĵon tre serioze, kaj timas, ke investantoj perdis fidon al la Tokia Borso.
Hajko de hodiaŭ
jen pritondite
ĝardenarboj viciĝas —
pli da ĉielo
Ĝardenistoj pritondis arbojn en la tereno de la proksima hospitalo.
Ŝukorno
Hieraŭ mi aĉetis poŝan ŝukornon. Ĝi estas farita el plasto kaj internaflanke tegita per lacerta ledo. Lacerta ledaĵo ne plaĉis al mi, sed ĝi estis unu sola speco de poŝa ŝukorno, kiun oni vendas tie.
Laŭ PIV2005 ŝukorno estas “duono de korno, segita laŭ la longo, kies larĝa parto servas por glitigi kalkanon en ŝuon“. Do en malnova tempo (aŭ ĉu ankaŭ nun?) oni faris ŝukornojn el la korno de bestoj. Mi neniam vidis veran ŝukornon.
Pri hajko en esperanto
De tempo al tempo mi promenas en Interreto. Tie kaj tie mi trovas retpaĝojn kun hajkoj en esperanto.
Mi estas certa, ke la hajko, mallonga fiksforma poemo jam enradikiĝis en la mondo de esperantistoj. Mi jam trovis belajn hajkojn en tiuj paĝoj. Sed, malkaŝe dirite, mi sentas neakordecon en plimulto de esperantaj hajkoj en tiuj paĝoj.
Mi lernis verki hajkojn unue en la japana lingvo, kaj poste en esperanto. Do mi kutimas verki kaj legi hajkojn en la japana stilo, kiu elmontras esencon de hajkarto.
Jam kelkaj esperantistoj krom japanoj verkas esparantajn hajkojn en la japana stilo. Mi esperas, ke tia verkado disvastiĝu en esperantistoj.
Hajko de hodiaŭ
fine elsendis
korektitan provaĵon —
floras sazanko
sazanko: Specio [Camellia sasanqua] de daŭrafolia arbusto, kiu portas blankajn aŭ ruĝajn florojn en vintro. Ĝi similas al kamelio [Camellia japonica], sed havas malpli grandajn foliojn kaj florojn ol kamelio. Ĝiaj petaloj kaj stamenoj estas malforte ligitaj kaj falas dise, dume la petaloj de kamelio falas ligite kiel unu korolo.