aŭtuna fundo —
glue al miaj kruroj
kato sin puŝas
Nun la sezono transiras de aŭtuno al vintro. Laŭ la japana malnova kalendaro vintro komenciĝos en la 7-a de novembro.
Aŭtoro: Vastalto
Hajko de hodiaŭ
kuŝanta kato
frapadas per la vosto —
aŭtuna pluvo
Certe kato esprimas siajn sentojn per movoj de la vosto.
Hajko de hodiaŭ
grakoj de korvoj
ŝutiĝas sur la straton —
vespera frido
En mia regiono korvoj multiĝas en aŭtuno kaj vintro, kaj malmultiĝas en printempo kaj somero. La kaŭzon mi ne scias, tamen tiel okazas en ĉi tiuj kelkaj jaroj.
Spamaj komentoj
Hodiaŭ tiu ĉi blogo ricevis 21 spamajn komentojn en la angla lingvo. Ĉiu spaminto kaŝas sin malantaŭ prokura servilo. Pro tio mi agordis la sistemon, ke ĝi ne akceptu komentojn el la serviloj kun tiuj retnumeroj, kiujn la spamintoj utiligis.
Se vi trovos ian maloportunon, bonvole skribu en la afiŝejo “Verda Kafejo”.
Hajko de hodiaŭ
varmon de kato
brakumas mi en sino —
altas Plejadoj
Plejadoj estas malfema stelamaso en la konstelacio Taŭro. Ordinara homo povas vidi nur 6 stelojn en ĝi, kvankam fakte ĝi estas aro de kelkcent steloj.
Dek homoj, dek koloroj
En la japana lingvo oni diras “Ĵuunin toiro (十人十色)”. Laŭvorta traduko en esperanton estas “Dek homoj, dek koloroj”. Ĝi signifas, ke ĉiu homo havas sian guston kaj penson diferencan al aliaj.
Mi trovis kelkajn samsignifajn proverbojn en la Proverbaro Esperanta de L.L.Zamenhof.
Kiom da homoj, tiom da gustoj.
Ĉiu tajloro havas sian tranĉmanieron.
En ĉiu kranio regas aparta opinio.
Skriboj de la mondo
Mi trovis interesan retpaĝaron, kiu titolas “skriboj de la mondo“. Jen la adreso:
http://purl.org/net/skrib01
Ja unuafoje mi ekvidis danco-skribon, per kiu oni registris sinsekvon de danco-moviĝoj sur papero. Oni povas trarigardi resumon pri la temo, kaj legi interesajn artikolojn pri diversaj literoj kaj skribiloj.
La paĝaro ankoraŭ ne estas kompleta. Ekzemple mankas priskriboj pri la ĉinaj kaj la japanaj literoj. Mi esperas, ke ĝi kompletiĝos iom post iom en kelkaj jaroj.
Marso plej proksima
Hodiaŭa vesperĵurnalo raportas, ke Marso plej alproksimiĝos al nia Tero en la 30-a de oktobro, nome morgaŭ.
Jam okazis la granda alproksimiĝo de Marso al Tero en aŭgusto de la jaro 2003. En ĉi-foja alproksimiĝo Marso distancos je 69 420 000 km (69 milionoj da kilometroj) de Tero. Oni vidos Marson je 80-procenta grandeco de la antaŭa alproksimiĝo.
Nun situante inter Ŝafo kaj Taŭro, Marso ruĝe helas je la magnitudo pli ol -2 (minus du !). Ĝi estas la plej hela en la nokta ĉielo.
Substitua aŭto
Mi devas meti mian aŭton al aŭtorevizio ĝis la fino de tiu ĉi monato laŭ la japana trafika leĝo. Antaŭhieraŭ mi telefonis al aŭtoriparejo por la revizio. Hodiaŭ mekanikisto elportis mian aŭton kaj anstataŭe metis substituan aŭton.
La substitua aŭto havas grandecon kaj cilindro-kapaciton pli-malpli saman al la mia. Sed kiam mi stiras kaj akcelas ĝin, ĝia reago estas senteble malsama.
Mi devas toleri la senteblan malsamecon dum kelkaj tagoj ekde hodiaŭ.
Nenormaleco de kat-amanto
Mia amata kato Bii foje petolas kaj bubaĉas. Kiam li estas en mia dormoĉambro, li gratas murpaperon per siaj ungoj.
Kiam li faras fi-agon, ĉiam mi riproĉe admonas lin. Li timigite forkuras, sed tamen ne cedas. Ĉiutage ni ripetas la samon. Pro liaj fi-agoj la murpapero jam estas ĉifonita.
Se la saman fi-agon faros mia filo aŭ alia homo, mi tutcerte indignos kontraŭ li kaj furioze riproĉos. Tamen, kiam mia kato faras la fi-agon, mi nur sentas domaĝon sed neniam indignas kontraŭ li. Eble tiuj, kiuj ne vivas kun kato, ne povas kompreni ĉi tian sintenon de kat-amanto.