Kiam mi vidas tigrolilion, mi rememoras la ĝardenon de mia naskiĝdomo. Ĉiusomere en mia infanaĝo, tigrolilio floris kun freŝe flavruĝa floro en la mezo de la malhele verda ĝardeno.
tigrolilio : Lilium lancifolium, plurjara herbo el liliacoj (Liliaceae), kiu altkreskas je ĉ. 1,5 m kun lancetformaj folioj kaj kun okulfrape flavruĝaj floroj. Ĝia skvama bulbo estas manĝebla. En la japana lingvo oni nomas ĝin “oni-yuri (鬼百合)” t.e. “ogrolilio”.
En la lasta majo mia edzino semis farbitojn, pri kies ĝermoj mi jam skribis.
Hodiaŭ matene unu el la farbitoj ekhavas la unuan floron en tiu ĉi somero. Mi kaj mia edzino estas tre ĝojaj. La farbitoj plezurigos nin per la diversnuancaj floroj ĉiumatene dum la venontaj kelkaj semajnoj.
Ni esperas, ke ankaŭ preterpasantoj plezuriĝu per la farbitaj floroj.
En la lasta majo mia edzino aĉetis plantidon de akvomelono kaj plantis ĝin en nia ĝardeneto. Nun ĝi portas unu flavan floron. Laŭ libroj akvomelono portas virajn florojn kaj inajn florojn sur unu volvotigo. Do ni bezonas plurajn florojn virajn kaj inajn por ke ni povu rikolti fruktojn de akvomelono.
akvomelono: Citrullus vulgaris, unujara grimpherbo el kukurbacoj, kies globa frukto estas dolĉa kaj sukoplena.
Jen beroj de somera eleagno. Kvankam ili estas bele ruĝaj kaj ĉarme ovalaj, ili gustas iom adstringe. En mia infanaĝo mi ofte manĝis ilin en la pluva sezono.
somera eleagno: Elaeagnus multiflora, falfolia arbeto el eleagnacoj, kiu portas blankajn florojn en aprilo kaj majo, kies fruktoj maturiĝas ruĝe en majo kaj junio.
Ĉio bela fontas el la naturo. Ĉiuj belartoj imitas la naturon.
Jen juna ĉiro de kukurbo kun hele blankaj lanugoj.
Ĝi aspektas kvazaŭ juna patrino brakumas sian bebon en iu abstrakta pentraĵo.
Komence de aprilo mia edzino aĉetis kaj plantis tri plantidojn de laktuko. Jam fine de aprilo ni rikoltis dekon da folioj por fari salaton. Bedaŭrinde tiuj filioj estis iomete tro amaraj al niaj langoj.
Poste ni lasis la laktukojn plu kreski en la ĝardeneto. Ili kreskis tagon post tago kaj ili jam ekportas florojn. Estis al mi la unua fojo, kiam mi vidis la floron de laktuko.
laktuko: Lactuca sativa, unu- aŭ du-jara herbo el asteracoj, kiu havas diversajn variojn kultivatajn en la mondo.
Ĉu vi povas diveni, kiu estas tiu floro?
Ordinare oni manĝas ĝiajn junajn foliojn.
Ĝi estas planto el asteracoj (iamaj kompozitoj).
La respondo venos morgaŭ. 😉
Antaŭ dek kelkaj jaroj mi ekhavis intereson pri plantoj, precipe pri sovaĝherboj. Estas mia plezuro trovi nekonatan de mi floron, konsulti ilustritajn librojn kaj identigi ĝin.
Sur la insuleto, kiun mi vizitis en la lasta sabato, mi trovis ĉarmajn floretojn apud vojeto. Estas bulbila sedo [Sedum bulbiferum], dujara herbo el krasulacoj, kun spatelformaj karnoriĉaj folioj kaj kun kvinnombraj flavaj floroj. El la foliakselo kreskas bulbilo, kiu falas teren kaj faras novan ĝermon.
Hodiaŭ mi kaj miaj familianoj vizitis insuleton 60 km norde de mia urbo. La insuleto estas konata pro tio, ke oni elfosis oran sigelilon de antikva epoko.
Tie mi trovis impresan planton kun infloresko de blankaj floretoj. Mi fotis ilin kaj, reveninte hejmen, konsultis librojn kaj retojn.
Ĝi estas herakleo, pli detale Heracleum lanatum Michaux subsp. moellendorffii (Hance) Hara, el apiacoj. Ĝi estas plurjara herbo 1 – 2 metrojn alta, kun plume kunmetitaj folioj el 3 – 7 folieroj. Laŭ la konsultitaj libroj, junaj folioj de la subspecio moellendorffii estas manĝeblaj, kvankam PIV 2005 difinas, ke herakleo estas “venena” herbo.
En la angulo de mia ĝardeneto troviĝas fosaĵo, en kiun ni forĵetas tranĉrubojn de legomoj. Tial de tempo al tempo, terpomoj, kukurboj k.a. elkreskas el la fosaĵo.
Jen stelformaj floroj kun kvin helviolaj petaloj kaj kun okulfrape elstarantaj flavaj anteroj (polensakoj). Tiuj estas floroj de terpomo [Solanum tuberosum]. Laŭ konsultita libro, el la floro malofte fariĝos malgranda frukto simila al tomato. Do mi esperis vidi la maloftan frukton en venontaj tagoj.
Sed ho ve! Jam en la sekva tago mia edzino eltiris ilin kaj rikoltis etajn tuberojn. Ŝi ĝojas preninte dekon da terpometoj per la ambaŭ manoj.