Kategorio: Plantoj

Nuntempe oni importas multajn florspecojn el diversaj eksterlandoj al Japanio.
Rudbekio estas komuna nomo de unu-, du- kaj plurjaraj herboj de la genro Rudbeckia el asteracoj. Ĉ. 15 specioj estas indiĝenaj en Norda Ameriko. Oni importis ilin por ornami ĝardenon antaŭ pli ol duonjarcento.
Rudbekion karakterizas relative granda kapitulo kun flavaj aŭ ruĝe brunaj langetfloroj (= ĉirkaŭfloroj) kaj nigre brunaj tubetfloroj (= mezfloroj).
Ili estas tre fortaj herboj. Iuj el plurjaraj specioj kreskas sovaĝe en japanaj kampoj.

Jen mi trovis floron de amuza formo. Ĝi ja similas al elektra ampolo laŭforme kaj laŭkolore.
La planto ŝajnas esti herbeca kun maldika tigo alta je ĉ. 1 metro. Sed kelkmetrojn distance staras alia planto kun samaj floroj, kiu altas je ĉ. 3 metroj. Ĝia tigo estas pli dika, sed ne aspektas kiel trunko de arbo.
Ĝi havas mane lobajn foliojn kun longa petiolo, kiuj alterne sidas ĉe la tigo.
Mi konsultis kelkaj librojn, sed bedaŭrinde ne trovis respondon.

Jen, arbo kun tre maloftaj floroj kvazaŭ broso por botelo, kiujn mi neniam vidis ĝis nun. Mi trovis ĝin apud iu gastejo, kies mastro verŝajne estas fervora floramanto, ĉar ĉikaŭ la gastejo troviĝis diversaj belaj floroj.
Konsultinte librojn, mi eksciis, ke ĝi estas kalistemono [Callistemon rigidus], ĉiamverda arbusto el mirtacoj, origine en Aŭstralio. Multe da amasiĝintaj longaj stamenoj similas al broso por lavi botelon. En la angla oni nomas ĝin “bottle brush” (= botelbroso) kaj en la japana oni nomas ĝin “burasi-no-ki” (= brosarbo).
Ĝi estas tre amuza arbo, ĉu ne?

Mi kaj mia edzino vizitis valon, kie oni plantis diversspecajn hidrangeojn. Estas sciate, ke la genro hidrangeo, precipe la specio grandfolia hidrangeo (= hortensio) [Hydrangea macrophylla], havas tre multajn kultivoformojn.
Jen la foto, kiun mi fotis en la valo. Unuavide mi ne pensis, ke ĝi estas speco de hidrangeo. Sed post observado mi rimarkis tiuj floroj simials al senseksaj ornamaj floroj de hidrangeo, kaj ke la folioj similas al tiuj de hidrangeo.
Konsultinte retpaĝojn, mi eksciis, ke ĝi estas kultivoformo de monta hidrangeo [Hydrangea serrata]. Ĉar infloresko varias eĉ en unu sama kultivoformo, mi ne povis decidi precizan nomon. Ordinare monta hidrangeo posedas duseksajn florojn meze de la infloresko. Tamen al tiu ĉi kultivoformo tute mankas duseksaj floroj.

En mia ĝardeneto plene floras blankaj floretoj de ruĝa pirakanto [Pyracantha coccinea]. Jes, ĝi estas “ruĝa” pirakanto, ĉar ĝiaj fruktoj fariĝas bele ruĝaj en aŭtuno (ĉi tie).
En Japanio troviĝas tri specioj el la genro pirakanto: mallarĝfolia pirakanto [Pyracantha angustifolia], ruĝa pirakanto [Pyracantha coccinea] kaj kreneleta pirakanto [Pyracantha crenulata]. Ili tri estas tre similaj.

La aromaj pizoj (bonodoraj latiroj) en mia ĝardeneto prosperas (ĉi tie) kaj nun portas guŝojn. Ilia guŝo estas verda kaj plene kovrita de blankaj lanugoj. Ĝi aspektas simile al manĝebla guŝo de fazeolo aŭ pizo.
En NPIV mi legas pri latirismo, ke “paralizo, kaŭzata de la venenaj semoj de kelkaj specioj de latiro”. Kiuj specioj estas vevenaj? Mi konsultis kelkajn librojn sed ne trovis detalojn.