Kategorio: Socio

Membroj de civitana organizo de Tokio plendis ĉe juĝejo, ke la guberniestro de Tokio elspezis kontraŭleĝe por 78 privataj bankedoj el publika kaso, kaj ke li redonu sume ĉ. 12 000 000 enoj (ĉ. 104 000 dolaroj). La distrikta juĝejo de Tokio jam verdiktis, ke okazis 2 kontraŭleĝaj elspezoj, kaj ke la guberniestro devas redoni ĉ. 400 000 enojn.
Kaj hodiaŭ la apelacia juĝejo de Tokio, modifante la verdikton de la unua instanco, verdiktis, ke la guberniestro redonu (nur) 58 000 enojn, kun la motivaĵo, ke la sumo de 42 000 enojn (ĉ. 365 dolaroj) por unu homo ĉe komuna manĝo ne kontraŭas al la ĝenerale akceptita ideo de la socio.
Mi neniam ĉeestis nek ĉeestos en tia luksegega bankedo! Maksimume 10 000 enoj (20 000 enoj okaze de geedziĝa festeno). Tio estas mia ideo.

La 6-a de aŭgusto estis la 62-a datreveno de la atombombado en Hiroŝimo. Multaj nebatalantoj-civiluloj mortis pro la atombombo. Kaj ankoraŭ suferas multaj postvivantoj. Okaze de la ceremonio la urbestro de Hiroŝimo, en sia pacdeklaro, alvokis ĉiujn homojn en la mondo al la paco sen nukleaj armiloj.
Mi tradukis la tutan tekston de la pacdeklaro kaj metis ĝin en arkivejo de mia retejo. La traduko estas legebla ĉi tie:
https://www.vastalto.com/arkivo/Pacdeklaro2007hirosimo.html

Antaŭ ol mia traduko jam ekzistis du esperantaj tradukoj. Mi honeste diru, ke mia traduko parte ŝuldas al ili. Dankon!
– Hiroŝima Esperanto-Societo
– Monda ASEMBLEO Socia (MAS)

Hodiaŭ, la 15-a de aŭgusto estas la 62-a datreveno de la fino de la 2-a mondmilito en Japanio. Mi aŭdis, ke 3 100 000 japanoj kaj 20 000 000 azianoj mortis pro la milito. Mi pensas, ke ni neniam ripetu militon.
En la 1930-aj jaroj la japanaj militistoj kaj kapitalistoj invadis Orientan Azion, pretekstante, ke ili liberigas Azion de la subpremo de Eŭropo. Tiama japana registaro antaŭenpuŝis ilian militpolitikon. Plimulto de la japana popolo obeis la registaron senpripense.
Ja ekzistis tiuj, kiuj klare vidis la trompon de la registaro. Sed ili estis malmultaj kaj malfortaj, fine estis subpremitaj. Ankaŭ ekzistis tiuj, kiuj dubas la militcelon. Sed ili estis ne maturaj, kaj estis dronigitaj en militpropagando.
Hodiaŭ mi devas esti saĝa por ne esti trompita. Mi ne permesu agojn de militŝatantoj. Mi uzu Esperanton por efektivigi pacajn rilatojn inter la popoloj.

Daŭras kontrolado de la atomcentralo de Kaŝiŭazaki-Kariha, kiun atakis la tertremo en la 16-a de ĉi-monato. La kontrolado ankoraŭ ne finiĝis, sed jam troviĝis pli ol 60 difektoj. La sep reaktoroj mem ŝajnas esti ne damaĝitaj laŭ la ĝisnuna ekzamenado. Sed ĉirkaŭ ili troviĝis kelkaj seriozaj difektoj.
Koncernatoj antaŭsupozas, ke oni bezonos almenaŭ unu jaron por refunkciigi la reaktorojn. Internacia Atomenergia Organizo (IAEO) decidis sendi fakulojn por inspekti la atomcentralon.

Hieraŭ, la 16-an de julio, intensa tertremo atakis la guberniojn Niigata kaj Nagano. La magnitudo de ĉi tiu tertremo estis 6,8. Ĝis nun pereis 9 homoj (ĉiuj maljunaj) kaj vundiĝis pli ol 1000. Pli ol 11 000 homoj tranoktis ĉe rifuĝejoj.
Tuj post la tertremo fajro okazis en loka atomcentralo. Izola oleo en transformilo ekster reaktora konstruaĵo bruladis kun nigra fumo dum du horoj ĝis estingiĝo. En la atomcentralo oni instalis 7 reaktorojn. Ĉiuj funkciantaj reaktoroj aŭtomate haltis tuj post la tertremo.
Laŭ observila registro la maksimuma akcelo de la tertremo estis 680 gal, 2,5-oble pli forta ol la antaŭsupozita valoro 273 gal ĉe planado. Radioaktiva akvo elverŝiĝis el akvujo entenanta uzitajn nukleajn fuelojn, kaj iom elfluis al maro. Koncernatoj diras, ke la kvanto de ellasita radioaktivaĵo estis tiel malmulta, ke ĝi ne donos malbonan efikon al homoj.
Falis 100 bareloj, en kiuj oni enfermis malaltnivelan radioaktivan forĵetaĵon. 2, 3 bareloj troviĝis sen fermilo. Efiko al ĉirkaŭmedio nun estas ekzamenata.
El fumtubo de unu el la reaktoroj oni detektis iom da kobalto 60 kaj aliaj radioaktivaĵoj nenormale. Koncernatoj diras, ke la kvanto estas en sendanĝera nivelo. Tamen la kaŭzo ne estas trovita.

La japana registaro publikigis la blankan libron pri handikapuloj por la kuranta jaro. Laŭ raportoj de amaskomunikiloj la nombro de mensaj malsanuloj en la jaro 2005 estis 3,03 milionoj, kiu pligrandiĝis je 450 mil ol tiu de 2002. La kabineta oficejo analizas, ke la pligrandiĝo de la nombro estas kaŭzita, unuflanke, de pli intensa streso de la nuntempa socio, kaj aliflanke, de pli facila konsulteblo de medicinaj institucioj.
La totala nombro de fizikaj handikapuloj, mensaj handikapuloj kaj mensaj malsanuloj estis 7,09 milionoj, kiu okupas 5,6 procentojn de la japanoj.

Laŭ iu televida programo la japanoj estas la unuaranga pingven-amanto en la tuta mondo. Ĉ. 40 procentoj el bredataj pingvenoj de la mondo vivas en Japanio. Kaj pingvenaj pupoj, kiujn fabrikis iu eŭropa firmao, vendiĝas plej multe en Japanio.
Ankaŭ mi amas pingvenojn pro ilia ĉarma figuro staranta kvazaŭ infano kaj pro ilia mallerta sed serioza irado sur tero. Mi scias ankaŭ tion, ke ili tre lerte naĝas en akvo. Ĝis nun mi vidis pingvenojn multfoje en zoologiaj ĝardenoj kaj en akvarioj.

Morbilo propagiĝas en japanaj studentoj. Jam de tri monatoj, dekoj da studentoj en multaj universitatoj en Tokio infektiĝis je morbilo. Pro tio oni fermis lekciojn portempe en pli ol dek universitatoj.
Morbilo estas infekta malsano pro moribila viruso, kiu kaŭzas febron kaj ruĝajn makuletojn sur la tuta korpo. Ĝis nun ĝi atakis ĉefe infanojn. Kial ĉi-jare ĝi atakas junulojn de ĉ. 20 jaroj?
Medicinistoj diras, ke de antaŭ 20 jaroj multiĝis infanoj nevakcinitaj aŭ unufoje-vakcinitaj. Ankaŭ infektitoj de moriblo estis relative malmultaj dum lastaj jaroj. Pro tio nuntempe estas multaj junuloj, kiuj ne havas imunecon kontraŭ morbila viruso.

ITO Itcho [ITOŬ Iĉĉoŭ]. la urbestro de Nagasaki, pafatakita per pistolo vespere de la 17-a de aprilo, mortis antaŭmatene de la sekva tago (hieraŭ). La atakinto, ŜIROO Tecuja, tuj arestita, estas supera membro de krimula bando en la urbo. La krimulo asertas, ke li pafis la urbestron pro tio, ke la urba aŭtoritatulo rifuzis lian plendon pri akcidento de lia aŭto.
La urbestro ITO, kiel konate, energie apelaciadis pri abolo de nukleaj armiloj al la tuta mondo. Li estis ĝuste en elekta kampanjo por urbestro. La pafatako kaj la morto de la urbestro multe ŝokas la tutan Japanion. Multaj homoj, ankaŭ mi, indignas la perforton kontraŭ demokratio kaj paco.

Laŭ japana ĵurnalo, en Usono oni diskutas pri tio, ĉu viando el klona bovo estas “organika” manĝaĵo aŭ ne. Organika bovo estas bredata per nutraĵoj el organika agrikulturo, kaj ne estas donita per kreskigaj hormonoj.
Do, kia estas klona bovo en organika bredado? FDA (la usona administracio pri manĝaĵo kaj medikamento) asertas, ke jes. Sed usonaj konsumantoj kontraŭas organikan klonan bovon.
Mi pensas, ke agnoski organikan klonan bovon estas tute kontraŭnatura kaj danĝera.