Hodiaŭ akompanante mian patrinon, mi vizitis ĝardenkulturan vendejon. La aero estis malvarma, sed sub la plena sunlumo ni sentis varmeton.
Tie oni vendas diversajn plantojn, sterkojn kaj potojn. Sur la antaŭkorto de la vendejo oni metis kelkajn junajn plantaĵojn de pendbranĉa umearbo, kiuj portas ekflorantajn ruĝetajn florojn.
Kategorio: Ĉiutaga vivo
Bela murornamaĵo
Jen flora brodaĵo ornamas muron de kafejo, kiun mi vizitas plurfoje en jaro. La interna dekoracio estas simpla sed eleganta. Mi povas ĝui bongustan kafon en trankvila atmosfero.
Hodiaŭ mi mendis mokaan miksaĵon kaj maronkreman kukon (Mont Blanc [monblan]).
Kobitido
Nuntempe japanoj nur malofte manĝas kobitidojn. Sed pli ol 100 jarojn antaŭe ili fojfoje manĝis kobitidojn ekzemple en misosupo. Kobitido estas malgranda, ne tre bongusta fiŝo en rivero kaj lago. Ĉar tiamaj japanoj estis malriĉaj, ili kaptis kobitidojn por manĝi.
Trafite!
Hodiaŭ frumatene mi vekiĝis pro forta vomemo en la stomako. Sekvis intensa frostotremo. Post horo laksoj. Febro altiĝis de 36,9 gradoj matene ĝis 37,7 gradoj posttagmeze. Ĝis la tagmezo vomemo kaj frostosento foriris. Lakso ĉesis. Sed nun, vespere, daŭras febro kaj malagrablo ĉe la stomako kaj la intesto.
Ne miskomprenu! Ne temas pri la toksiĝo pro la ĉina ĝiaŭzo.
Ĉi-foje temas pri akuta gastroenterito (stomakintesta inflamo) pro viruso. Verŝajne pro noroviruso [Norovirus].
Sakuroj sur 8-etaĝa domego
Hodiaŭ mi kaj mia edzino vizitis magazenon en urbego trajne unu horon malproksima de nia urbo. Ni prenis tagmanĝon ĉe restoracio en la 8-a etaĝo de la magazeno. Flanke, ekster la restoracio, mi trovis plurajn sakurojn kun kelkdek floroj. Oni faris ĝardenon sur la tegmento laŭ la suda flanko de la restoracio. Mi miras, kiel oni traktas disetendiĝantan radikon de la sakuroj.
La sakuro ŝajnas esti vintra sakuro [Prunus x kanzakura], kiu ordinare floras en februaro.
Verda marĉevaleto
Sub la tablo mi trovis verdan marĉevaleton (hipokampo), egan rozkoloran languston kaj nigrebrunan kankregon. Kaj aldone, ankoraŭ unu nekonatan etan insekton. Do certe mi volis foti ilin.
Mi prenis mian ciferecan fotilon kaj celis unue la nekonatan insekton. Sed ĝi estis tre malgranda kaj facile moviĝis. Pro tio aŭtomata enfokusigo de mia fotilo ne funkcias ĝustatempe. Dum mi plurfoje provis enfokusigi la insekton, ĝi finfine forkuris.
Nun mi turnis la fotilon al la langusto. Al mia miro la vivuloj jam estis malaperintaj el la ĉambro. Tiam mi rimarkis, ke mi ja sonĝas. Tamen estis tre bela la briletanta haŭto de tiu verda marĉevaleto.
Ulong-teo
Ĉiutage mi trinkas Ulong-teon. Duonfermentinta teo produktata en Ĉinio. Infuzaĵo de Ulong-teo havas similan koloron al nigra teo, sed aliajn odoron kaj guston.
Onidire daŭra trinkado de Ulong-teo bone efikas por elkorpigi grason akumulitan en internaj organoj (ne sub haŭto). Antaŭ ĉirkaŭ dek jaroj oni diagnozis, ke mi havas grasan hepaton. Tiam mi komencis trinki Ulong-teon po preskaŭ unu litro ĉiutage. Kaj post unu jaro mia hepato malgrasiĝis kaj resaniĝis.
Nun mi trinkas la teon meze po ĉ. duonlitro ĉiutage.
Albizio? mimozo?
Hodiaŭ mi kaj mia edzino vizitis kafejon. Mi mendis kafon kun kuko. Ŝi mendis zenzajon (dolĉaĵo, azukia supo kun moĉio) kun pulvora teo.
Apud fenestro de la kafejo mi trovis interesan arbusteton altan je ĉ. 1 metro. Unue mi pensis pri sentema mimozo [Mimosa pudica]. Sed formo de la duoble plume kunmetitaj folioj ŝajnas malsama al tiu de mimozo. Kiam mi tuŝis la folion, ĝi ne kuntiriĝis. Ĉu ĝi estas speco de albizio? Tamen ĉi tie ordinara albizio estas arbo kun alto de 5 ~ 10 metroj [Albizia julibrissin]. Ĉu ĝi estas juna arbo aŭ alispecia albizio? Mi ne kapablas identigi ĝin.
Pagro
Pagro [Pagrus major] estas mara fiŝo el la familio de sparedoj. Plej grava manĝebla fiŝo en Japanio. Ĝia blanka karno estas dentorezista kaj negrasa. Oni manĝas ĝin per saŝimo (kruda tranĉpeco), rostaĵo, bolkuiraĵo ktp.
Japanoj pensas, ke pagro estas bonaŭgura fiŝo. Tial ni ŝatas regali per ĝi okaze de diversaj festoj (ekz. geedziĝa festo).
[Foto far Miya, licencita per “GFDL, cc-by-sa-2.5, cc-by-sa-2.1-jp“]
Sazanko floras
En vintro multaj arboj staras nudaj sen folioj. Kelkaj ĉiamverdaj arboj portas ruĝajn fruktetojn. Tre maloftaj estas florantaj plantoj.
En tia vintro sazanko (Camellia sasanqua) elstaras kun belaj ruĝaj floroj. Do oni ŝatas ĝin kaj kultivas kiel ĝardenarbon. Sazanko eĉ aperas en tekstoj de kelkaj popularaj kantoj.