Daŭras ankoraŭ varmegaj tagoj. Sed oni diras, ke la kulmino de varmego jam pasis. Malpli varmegaj tagoj postsekvos.
Hieraŭa maksimuma temperaturo estis 31,7 celsigradoj kaj la hodiaŭa 33,3 celsigradoj. Mezaltaj blankaj nuboj kovras duonon de la blua ĉielo. Somero malkreskos iom post iom.
Farbitoj floras ĉiumatene. Ĉi-somere ĉiu floro havas saman helviolan koloron. Ĝis la lasta somero ĉe ni floris diverskoloraj farbitoj. Bluaj, ruĝe purpuraj, helviolaj ktp. Kial ĉi-jare floras farbitoj kun nur helviola koloro? Mi kaj mia edzino iomete bedaŭras monotonecon de la koloro.
Kategorio: Ĉiutaga vivo
Batalo kontraŭ librokaoso
Dum la lastaj jaroj mi multfoje entreprenis reordigon de miaj libroj en bretaro. Kaj neniam mi sukcesis. Hodiaŭ mi denove planis reordigon de la librobretaro, ĉar mi devas iel enmeti la 23 novajn librojn, kiujn mi aĉetis en la UK.
Mi ŝovis kelke da libroj tien kaj ĉi tien kaj faris spacetojn, kien mi metis kelkajn novajn librojn. Tamen plimulton de la libroj mi devis meti kuŝe sur kresto de libroj vice starantaj sur la breto.
Daŭras plu mia barakto kontraŭ librokaoso.
Genuo doloras
Hodiaŭ mi vizitis ortopediiston, ĉar la dekstra genuo doloras min ekde la lasta vendredo. Dum ĉi tiuj tagoj mi piediras malfacile. La ortopediisto palpis mian genuon kaj svingigis mian kruron. Kaj oni radiografis mian genuon.
Li diagnozis, ke menisko de la genuo, t.e. interartika kartilago, vundiĝis pro troa ŝarĝo, kaj ke serozaĵo akumuliĝis en la genuo pro inflamo ĉe la menisko. Li konsilis al mi, kiel eviti ŝarĝon ĉe la genuo, kaj donis al mi kataplasmon. Tri semajnojn mi bezonos por resaniĝo de la genuo.
Vizito al frato
Hodiaŭ okazis tuttagaj ekskursoj de UK92. Certe multaj kongresanoj, dividite en grupojn, vizitis diversajn vidindajn lokojn ĉirkaŭ Jokohamo: Tokio, Hakone, Kamakura, Kaŭasaki, la Monto Fuĵi ktp.
Sed mi ne partoprenis en la ekskursojn. Mi havas unu fraton, kiu longe loĝas en Tokio. Ni vidas unu la alian unu-du foje en unu jaro ĉe nia hejmloko. Tamen mi neniam ĝis nun vizitis lin en Tokio. Profitante ĉi okazon, mi decidis viziti lin.
Mi bezonis pli ol unu horo por veturi de Jokohamo al mia frato en Tokio. Li loĝas en apartamento en kvieta loĝkvartalo. Ni havis plezurajn horojn, babilante pri diversaj aferoj. Hodiaŭ estis ja bona tago.
Ek al Jokohamo
La Tajfuno 5 pasis hieraŭnokte preter mia regiono. Ventegis kaj pluvegis, sed ne okazis damaĝo ĉirkaŭ mi.
Morgaŭ matene mi ekiros al Jokohamo, la urbo de la 92-a UK. Laŭ informo de la hotelo, kie mi loĝos dum la kongresa periodo, oni povos aliri al la Interreto.
Ankoraŭ restas diversaĵojn por enpaki en la kofron. Nu, mi plenumu farendaĵojn.
Tajfuno Usagi
La 29-an de julio Tajfuno n-ro 5 (Usagi) naskiĝis sur la maro ĉirkaŭ la Marianaj Insuloj, 2000 km sude de Japanio. Kreskante iom post iom, ĝi iras al nordokcidento.
Laŭ anonco de la Meteologia Agentejo, ĝi situis je la 21-a hodiaŭ ĉe 139 gradoj de la orienta longitudo kaj ĉe 23,4 gradoj de la norda latitudo. Ĝia aeropremo de la centro estis 955 hektopaskaloj (hPa). Ĝia maksimuma ventorapido estis 40 metroj por sekundo (m/s). Ĝi iris al nordnordokcidento kun la rapido de 15 kilometroj por horo (km/h).
Laŭ la prognozo la tajfuno proksimiĝos kaj trapasos nian regionon en la 3-a de aŭgusto. Ho, ve! La 4-a de aŭgusto estos la tago de mia ekvojaĝo al la UK. Ĉu mi povos senprobleme flugi al Tokio?
Sunflora kampo
Hodiaŭ mi kaj mia edzino vizitis “sunfloran ĝardenon” apud maro. Fakte, temas pri sunflora kampo. Jen rigardu la foton. Mi ne scias, kiom da sunfloroj tie kreskas. Tamen sufiĉe multe por ĝui sunfloron. Mi vidis pli ol cent spektantoj.
Hazarde estas kaptita, figuro de ruĝlibelo supre maldekstre en la foto. Ankaŭ abeloj diligente laboris kolektante nektaron kaj polenon de sunfloro.
Kato en varmego
Daŭras vere varmegaj tagoj de kulminanta somero. Hodiaŭ la maksimuma temperaturo estis 33 gradoj celsiaj.
Ankaŭ mia amata kato Bii suferas pro ĉi tiu varmego. De tempo al tempo li kuŝiĝas kaj dormetas surdorse. Tamen li estas ja ĉasisto! Rimarkinte brueton aŭ moveton, li tuj malfermas la okulojn.
Preparo por UK
Mi partoprenos en la 92-a Universala Kongreso de Esperanto ekde la 4-a ĝis la 11-a de aŭgusto. Mi jam mendis hotelon de meza prezo. Aĉetis iran flugbileton al Haneda. Pretigis kofron por 8-taga vojaĝo. De morgaŭ mi pakos vestojn kaj aliajn aĵojn en la kofron.
Restas ankoraŭ kelkaj farendaĵoj:
* Aĉeti revenan flugbileton de Haneda.
* Presi preleg-dokumentojn pri hajko.
* Certigi rimedon de surloka aliro al la Interreto, ĉar mi volas daŭrigi ĉi tiun blogon dum la kongres-periodo.
Kaŭzo de la doloro
Antaŭhieraŭ mi skribis pri la doloro ĉirkaŭ mia dekstra skapolo. Mi konjektis la kaŭzon, ke la muso, kiun mi uzadis lastatempe, kulpas al la doloro. Ĝi estas malgranda tipo, kiun manipuli mi devas per iomete streĉita mano. Tiu streĉeto, akumulite, kaŭzis la doloron, tiel mi pensis.
Hieraŭ mi aĉetis novan muson kaj anstataŭigis per ĝi la malnovan. Hieraŭ kaj hodiaŭ mi ne sentas doloron ĉirkaŭ la skapolo. Do mia konjekto ŝajne trafis.