Ankaŭ ĉi-jare
venis la sezono de farbito.
Du, tri floras en matena pluveto.
Farbita funelo ricevas pluverojn.
La korolo fleksiĝas,
ĉu?
pro pezo de pluvgutoj.
Kategorio: Ĉiutaga vivo
Plastro
Hodiaŭ mi skribadis antaŭ mia komputilo tuŝante klavojn kaj klakante muson. Posttagmeze la muskoloj ĉirkaŭ la dekstra skapolo (plata osto de la posta parto de la ŝultro) al mi ekdoloris. Vespere la doloro fariĝis pli intensa. Do, mi gluis tri folion da plastroj sur mia dekstra skapolo. Nun la plastroj bone efikas al mi, kaj la doloro fariĝis milda. Mi estas ja feliĉa.
Neuza sindromo
Oni priparolis pri neuza sindromo en iu televidprogramo. Se ni ne uzas iun parton de la korpo, ĝi malfortiĝas kaj donas malbonan efikon al nia sano. Tio estas neuza sindromo.
Lastatempe mi havas neordinaran senton ĉe miaj genuaj artikoj. Ne temas pri doloro. Nur neglata moviĝo de la genuaj artikoj, kiam mi piediras. Dum ĉi tiuj kelkaj semajnoj mi laboradis ĉe mia skribtablo, sidante longan tempon sur seĝo. Do, ĉu la simptomo ĉe miaj genuoj rilatas al “neuza sindromo”? Hmmm…
Pluvegas
Hodiaŭ ja pluvegas! Matene mi iris eksteren kun ombrelo dum kelkaj minutoj, kaj reveninte, la subgenuaj partoj de mia pantalono jam tute malsekaj. Vespere mia filo revenis hejmen kun tute malsekaj vestoj.
La loka meteologia observatorio proklamis alarmon pri pluvego kaj inundo. La cuja fronto staradas sur nia regiono kaj vigle aktivadas. La observatorio prognozas, ke pluvos maksimume je 350 mm ĝis morgaŭa vespero. Ĉi tiu prognoza pluvokvanto superas averaĝan monatan pluvokvanton de julio en nia regiono.
Sereno en cujo
Cujo estas japana pluvsezono, kiu daŭras pli ol unu monato ekde junio ĝis meza julio en nia regiono. Ĉar Japanio estas lando ĉirkaŭita de maroj, alta humideco karakterizas ĝian klimaton. Mi iam legis novelon, en kiu ĉefrolulo, alilandano ekloĝinta en Japanio, estis turmentata de nespertita intensa humideco dum cujo.
Fakte pluvado ne daŭras senĉese dum cujo. Fojfoje aperas la suno kaj la blua ĉielo. Sed ja tute limigite! Ĉiam grizaj nuboj minacas per pluvoj. Altaj temperaturo kaj humideco atakas homojn. Tamen ventoj el sudo vigle blovadas, kio iom mildigas varmecon kaj humidecon de la atmosfero.
Nova frostofridujo
En la lasta semajno mi kaj mia edzino vizitis elektraparatan magazenon por aĉeti novan frostofridujon. Ni anticipe elektis du kandidatojn el varkatalogo, kiuj ambaŭ havas sufiĉe bonan plenumpovon por nia uzo.
Ni marĉandis kun komizo pri la prezo, kaj fine li proponis 20 procentojn da rabato pri unu fridujo. Ni, do, kontente decidis aĉeti tiun rabatitan fridujon.
Ek de la lasta sabato la nova fridujo staras en nia kuirejo. Ĝi havas kelkajn novajn funkciojn, kiuj ja plaĉas al ni.
Kat-ornamaĵo
Mia amata kato Bii ŝatas englitiĝi en malvastan kavon aŭ truon.
En nia familia ĉambro kuŝas malalta ŝranko kun vitraj pordoj, sur kiu sidas televidilo. En la ŝranko ni metas videobendilon, DVD-ludilon kaj kelkajn ornamajn katpupojn.
Hodiaŭ mia amata Bii enŝteliĝis en la ŝrankon kaj kuŝis apud la pupetoj. Mi kaj mia edzino ridis kaj diris, ke li estas tro granda ornamaĵo por la ŝranko.
Tomato fruktas
Daŭras sunaj kaj varmaj tagoj. Iujn tagojn la maksimuma temperaturo ja superis 30 gradojn celsiajn. Tia vetero certe favoras kreskadon de niaj tomatoj.
Ili jam ekportis verdajn fruktojn. En la foto vidiĝas malgrandaj fruktoj de kultivformo tiel nomata “mini-tomato”. Baldaŭ ili maturiĝos kaj fariĝos ruĝaj.
Kukurbo floras
Ankaŭ ĉi-jare kukurbo elkreskas el la truo fosita por legomaj ruboj en nia ĝardeneto. Ni ne semis nek plantis ĝin. Ni nur forĵetadis kukurbajn semojn en la truon. Nun ĝi havas jam kelkajn flavajn florojn. Mia edzino tre ĝojas kaj atendas, ke la kukurbo alportos kelkajn fruktojn.
Varme
Estas varme ankaŭ hodiaŭ. La maksimuma temperaturo estis preskaŭ 29 gradoj celsiusaj en nia regiono.
Mia amata kato Bii ofte ŝanĝas sian siestejon. Mi supozas, ke li ŝanĝas lokon, ĉar la loko (planko aŭ breto), kie li kuŝis, fariĝis pli varma pro lia korpa temperaturo. Li serĉadas malpli varman lokon por siesti.