Sekvas nubaj tagoj. Vento estas malvarma. Aera temperaturo malaltiĝas pli kaj pli.
Estas certe, ke tia nuba ĉielo premas homan koron.
Nuba ĉielo
Kategorio: Ĉiutaga vivo
Venis la sezono de sazanko
Sezonoj forpasas kaj revenas. La tero rondiras ĉirkaŭ la suno. Plantoj ne forgesas sian flortempon. Estas ripetiĝoj dum miloj da jaroj.
Venis la sezono de sazanko.
Vesperiĝo pli kaj pli frua
Vesperiĝo en novembro estas pli kaj pli frua. La suno sinkas kvazaŭ sitelo falas en puton. Oni hastu al la hejmo.
Kolaziono kun teo
Hodiaŭ posttagmeze mi kaj mia edzino vizitis la tesalonon apud kanaleto. Ni sidis ĉe la tablo apud la fenestro, kiu rigardas al la kanaleto. Rigardante preterirantajn turistojn, ni ĝuis teon kaj kukon kun babilado.
Jen estas ĉifonkuko kun pomo kaj cinamo, kiun mi mendis. Estis tre bongusta!
Rabiulo mortis
Laŭ kelkaj ĵurnaloj, hodiaŭ matene mortis rabiulo, 60-jaraĝa viro en Kioto. Rabio troviĝis en Japanio post 36 jaroj ekde 1970. La viro vojaĝis en Filipinoj en la lasta aŭgusto, kaj tie li estis mordita je la mano far sovaĝhundo.
Lastajn jarojn oni tute ne aŭdis pri rabio. Sed, kiam mi estis infano, mi fojfoje aŭdis pri rabio de hundoj. Tiutempe kaptistoj de sovaĝhundoj laboradis komisiite de sanitara oficejo.
Plano de vojaĝeto
Mi kaj mia edzino nun planas dutagan vojaĝeton en la venonta decembro. Ni priekzamenis kelkajn kandidatajn lokojn kaj elektis certan varmofontejon en montara regiono. De nun mia edzino faros itineron de la vojaĝeto.
Estas pli malvarme hodiaŭ
Hodiaŭ estas pli malvarme al mi ol hieraŭ. Kvankam la maksimuma temperaturo fakte estas 2 gradojn pli alta ol hieraŭ, tamen mi sentas pli da malvarmo. Tial mi surmetis veŝton sub jako.
Kotaco estas preta
Hodiaŭ ni pretigis kotacon en la familia ĉambro por la venontaj malvarmaj tagoj.
Kiam mi sidis ĉe la kotaco, mia amata kato Bii alsaltis sur miajn genuojn. Li tre amas kotacon.
*kotaco = japana tradicia varmigilo. malalta tablo kovrita per vatita tolaĵo, entenanta hejtilon.
Abrupta pluvego
Hodiaŭ, malfrue en vespero, abrupte eksonis bruo, kvazaŭ oni disĵetis fabojn sur fenestraj vitroj. Estis ekpluvego. Aldone fulmis multfoje kaj tondris.
Malvarma fronto trapasis nian regionon laŭ la veterinformo. Mi imagis tre alte kreskantajn kumulonimbusojn super mia urbo.
Vintra preludo
Subite estis malvarme hodiaŭ. La matena minimuma temperanturo estis 12 gradoj kaj la maksimuma 14 gradoj. Hieraŭ la minimuma 15 kaj la maksimuma 19 gradoj.
Ekde hieraŭ intense malvarma aermaso el Siberio trapasas super Japanio. Nun loka meteologia observejo raportas, ke la temperaturo estas 10 gradoj. Laŭ veterprognozo morgaŭmatene minimuma temperaturo estos 6 gradoj.
Hodiaŭ estas la unua tago de vintro laŭ la japana kalendaro. Efektive hodiaŭo indas esti nomata tiel.