Jam komenciĝis la jaro 2006. Ĉe la sojlo de la nova jaro mi deziras al ĉiuj bonan kaj feliĉan jaron. Estu paco sur la tero kaj amikeco inter homoj.
Jen tiu ĉi estas mia novjara salutkarto. Tiu ĉi jaro 2006 estas la jaro de hundo laŭ japana moro, kiu atribuas ĉiun jaron al unu el 12 bestoj: muso, bovo, tigro, kuniklo, drako, serpento, ĉevalo, ŝafo, simio, koko, hundo kaj apro.
Baldaŭ finiĝos la jaro 2005. En aŭgusto mi komencis ĉi tiun blogon. De tiam ĝis hodiaŭ mi afiŝadis artikoletojn ĉiutage.
Ĉiutage ion fari krom manĝi kaj dormi, estas tre malofta afero koncerne min. Do gratulon al mi mem.
Kaj tio signifas ankaŭ, ke tiu ĉi jaro estis tiel paca kaj bona por mi, ke mi ne rompis la afiŝadon. Kaj mi dankas legantojn kaj komentintojn, kiuj kuraĝigis min daŭrigi ĉi tiun blogon. Mil dankojn!
Mi deziras al ĉiuj legantoj feliĉan kaj prosperan novjaron.
Ekde antaŭhieraŭ mi faras novjarajn kartojn por la jaro 2006.
Mi unue desegnis bildon per krajono kaj enkomputiligis ĝin per skanilo. Kaj due mi kolorigis kaj modifis la bildon sur grafika programo de la komputilo. Kaj trie mi faris mesaĝkarton per tekstilo kaj enmetis la bildon en ĝi. Nun mi presas la kartojn multoble per presilo.
Morgaŭ aŭ postmorgaŭ mi sendos ilin per poŝto. Ĉi-jare mi elsendos ĉ. 80 kartojn al miaj amikoj, parencoj, kolegoj kaj konatoj. Nun japanaj poŝtistoj laboregas tre okupite pro inundo da novjaraj kartoj. Mil dankojn al la poŝtistoj.
Hieraŭ mi vizitis artomuzeon, kaj tie trovis novjaraj pinornamojn antaŭ la perono.
Oni kune metis pinon, bambuon, umeon, nandinon kaj ornambrasikon en unu poto.
Laŭ folklora rakonto la pinornamo estas celobjekto, kiun vizitas kaj gastas la novjara dio, kiu donos feliĉon kaj rikolton.
nandino: genro [Nandina el berberisacoj] de ĉiamverda arbeto. Unu specio [Nandina domestica] estas populara en Japanio, kiu portas belajn ruĝajn globofruktetojn en vintro.
Mi kaj mia edzino vizitis artomuzeon, kie oni ekspozicias pentraĵojn, gravuraĵojn kaj skulptaĵojn sub la temo “Duopoj en Arto”. Troviĝas multaj verkoj, kiuj temas pri du homoj: “viro kaj virino”, “du viroj”, “du virinoj”, “patrino kaj ŝia infano”, “pentristo kaj modelo” kaj tiel plu.
Jen kelkaj plaĉaj verkoj el la eksponaĵoj:
Marc CHAGALL: “La branĉo”.
MURAI Masanori: “Du Homoj en Modo”.
Fernand BOTERO: “Adamo kaj Eva”.
Ay-O: “Bildorakonto: Ms. and Mr. Rainbow (N-ro 1 – 10)”.
Pablo PICASSO: “La Pentristo kaj Lia Modelo”.
Mi bedaŭras, ke mi ne povas montri ĉi tie fotokoiojn de la verkoj por observi la kopirajton.
Neĝis ĝis la frua mateno de hodiaŭ. Poste la matena suno aperis el inter nuboj.
La neĝo tavolis je kelkaj centimetroj. Estas la unua neĝa tavoliĝo en tiu ĉi vintro. Tavoliĝo en decembro estas eksterordinare frua okazaĵo en nia regiono.
La foto montras kanalon, kiu fluas malantaŭ mia domo. Estas onidiro, ke neĝo ĉion beligas. Mi ja aprobas la onidiron.
Estas tre malvarme hodiaŭ. Tage pluvis kaj vespere pluvo ŝanĝiĝis al neĝo.
Oni antaŭsupozas, ke neĝo tavoliĝos morgaŭmatene. Tio estas malofta afero en nia regiono, nur unu- aŭ du-foje en jaro.
Nun neĝo blovas ekstere kaj ektavoliĝas sur tegmentoj.
Hodiaŭ mi ludis bovlingon en bovlingoludejo.
Je la unua ludo mi gajnis 70 poentojn el plenaj 300 poentoj, kaj je la dua ludo 95 poentojn. Mi dufoje plenfaligis dek keglojn per unu globo, kaj nur unufoje per du globoj. Do multaj kegloj restis starantaj. (Se oni scias la terminojn pri bovlingo, bonvole sciigu al mi.)
Jes, mi estas mallerta ludanto de bovlingo. (plor!)
bovlingo : Uson-devena kegloludo kun dek kegloj, ekipita per aŭtomata globtunelo.
Mi de tempo al tempo prove fotas miajn ĉirkaŭaĵojn per la nova cifereca fotilo.
Jen mia amata kato Bii! Li suspektas, kion mi faras.
Tiu ĉi foto estis farita per grandangula fino (28 mm) de la zomobjektivo. Rapida reago de la obturilo bone funkcias por kapti fotindan ŝancon.
Jen mi aĉetis novan ciferecan fotilon, “Caplio R3” de la kompanio Ricoh.
Mi estas kontenta pri ĝia kapablo. Tamen mi bedaŭras, ke al mi mankas liberan tempon por foti belajn pejzaĝojn.