nenio ardas
pro senvarma sunlumo —
miskantospikoj
Vintro jam estas ĉe la sojlo.
Miskanto estas genro [Miscanthus] el poacoj, plurjara herbo ordinara en japanaj kampoj. Ĝi havas spikojn kun arĝent-blankaj haretoj en aŭtuno.
Kategorio: Hajko
Hajko de hodiaŭ
aŭtaj lumstrioj
sur nigra strato, kirle
velkaj folioj
Mi veturas per aŭto ĉiunokte de la laborejo ĝis la hejmo.
Hajko de hodiaŭ
folioj ruĝaj,
folioj flavaj, antaŭ
biblioteko
Mi ŝatas ruĝajn foliojn de roŭso [Rhus succedanea].
Hajko de hodiaŭ
aŭtuna fundo —
glue al miaj kruroj
kato sin puŝas
Nun la sezono transiras de aŭtuno al vintro. Laŭ la japana malnova kalendaro vintro komenciĝos en la 7-a de novembro.
Hajko de hodiaŭ
kuŝanta kato
frapadas per la vosto —
aŭtuna pluvo
Certe kato esprimas siajn sentojn per movoj de la vosto.
Hajko de hodiaŭ
grakoj de korvoj
ŝutiĝas sur la straton —
vespera frido
En mia regiono korvoj multiĝas en aŭtuno kaj vintro, kaj malmultiĝas en printempo kaj somero. La kaŭzon mi ne scias, tamen tiel okazas en ĉi tiuj kelkaj jaroj.
Hajko de hodiaŭ
varmon de kato
brakumas mi en sino —
altas Plejadoj
Plejadoj estas malfema stelamaso en la konstelacio Taŭro. Ordinara homo povas vidi nur 6 stelojn en ĝi, kvankam fakte ĝi estas aro de kelkcent steloj.
Hajko de TAKAHA Ŝugjoŭ
de sur ĉielskrapanto
freŝverdaj boskoj
petroselite
— tradukita de Vastalto
TAKAHA Ŝugjoŭ [Shugyo] estas japana populara hajkisto (1930- ). Tiun ĉi hajkon li verkis en Nov-Jorko.
Hajko de hodiaŭ
persimonarbo —
altas sur ĉielbluo
fera turgruo
Kelkcent metrojn sude de mia domo nun estas konstruata iu hospitala domego ekde tiu ĉi printempo. Ĉiutage mi vidas la turgruon por la konstruado trans najbaraj tegmentoj.
Hajko de Murata keinosuke
Najbara domo,
plenruĝas persimono, —
ne loĝas homo.
— el “Nokturno ’71” (1971)
Tiu ĉi estas verko de Murata keinosuke, japana esperantisto (1910-1987), membro de la Hajkista Klubo.
Iam antaŭe ofte mi vidis persimonarbon en ĝardenoj de ordinaraj domoj. En aŭtuno ĝi portas multe da flavruĝaj fruktoj. Persimono matura estas bongusta, kaj mi amas ĝin manĝi.
La verkinto trovis la persimonarbon plenan de flavruĝaj maturaj fruktoj en la najbara loĝejo. Sed la posedinto de la arbo jam estas for de la domo kaj neniam revenos. Ĝojo pro naturo kaj malĝojo pro homo.