Kategorio: Kato

Mi aĉetis liteton por kato, kiu konsistas el kuseneto kaj pufa ĉirkaŭbarilo. Komence mia amata kato Bii gardeme flaris la liton sed ne kuŝis en ĝi. Poste mi metis en la lito la elektran tapiŝeton, sur kiu li ofte dormas ekde la lasta vintro. Nun finfine li kuŝas kaj dormas en la nova lito. Bonan nokton!

Mia amata kato Bii ne amas veturi per aŭtomobilo. Sed malofte li devas kunvojaĝi kun mi kaj mia edzino per aŭto. Tiuokaze li ŝajnas ege stresata. Ho, kompatinda Bii! Li daŭre miaŭadas maltrankvile. Li malstabile alkroĉiĝas sur dorsapogilo de remburita benko dum mi stiradas.
Reveninte hejmen li dormetas sen streso sur remburita seĝo en la familia ĉambro.

Mia amata kato Bii estas preskaŭ 13-jaraĝa. Do li estas jam maljuna kiel kato. Liaj moviĝoj kaj reagoj nun estas malpli rapidaj ol antaŭe. Liaj haroj forfalas pli multe.
Tamen li estas senŝanĝe ĉarma kaj pli dorlotiĝema ol antaŭe. Li agas kvazaŭ infano. Mi kaj mia edzino ĝojas kaj ĝuas la vivon kun li.
Antaŭ du jaroj li grave malsaniĝis. Kvankam li feliĉe resaniĝis, tiam ni ekpensis pri lia morto. Ĉiu vivo havas ja sian finon. Sed ni elkore deziras, ke la amata Bii vivu kiel eble plej longe.

Mia amata kato Bii, malferminte la pordon, eniris mian ĉambron. (Li estas tute senproblema pri malfermado, kvankam ĉiam problema pri fermado.) Eksidande apud mi, kiu sidas antaŭ komputilo, li ripete almiaŭas al mi. Li ŝajnas peti ion. Ĉu manĝo? Aŭ ĉu kareso?
Mi prove etendis mian piedon al li. Li tuj metis sian kapon sur mia piedo kaj ekkuŝis ĵetante la kvar membrojn. Li preferas dikfingron de miaj piedoj (ol manfingrojn), kiu karesas lian kapon. La kialon mi ne komprenas. Mi demandos lin, kiam mi ellernos katlingvon.

Mia amata kato Bii ŝatas kuŝi kaj dormeti sur la seĝo en la familia ĉambro. La seĝon kutime mi okupas dum manĝoj kaj ripozoj, ĉar mi ne povas sidi kun falditaj genuoj sur tatamo pro doloro ekde la lasta somero.
Okaze de hodiaŭa tagmanĝo mi trovis lin kuŝanta sur la seĝo. Mi forprenis lin kaj eksidis sur la seĝo. Li rezignis la seĝon kaj ekkuŝis antaŭ la televidilo.
Post la manĝo mi aliris apud Bii kaj eksidis kun rektaj genuoj. Li rimarkis min sed ne tuj reagis. Post minutoj li rigardis al la seĝo kaj ŝajne rimarkis, ke la seĝo estas vaka. Li facilmove aliris al la seĝo, eksaltis kaj kuŝiĝis sur la seĝo. Kaj li kontente ekdormetis.
Laŭ mia observo kaj rezonado, mia amata kato Bii ne eksciis, ke la seĝo estas vaka, kiam mi eksidis apud li. Li eksciis nur tiam, kiam li vidis propraokule la vakan seĝon. Mi konkludas, ke mia amata kato ne posedas imagpovon aŭ rezonpovon, kiu ebligas, ke li supozu la vakan seĝon, trovinte min apud li.

Hodiaŭ mi vizitis mian patrinon. Ĉi-foje mi kunprenis mian amatan katon Bii. Mi kunprenis lin nur du-tri fojojn jare al la patrino. Tiaokaze ni pasigas plurajn tagojn ĉe ŝi.
Post iom da ripozo en familia ĉambro mia amata kato Bii volis eliri el la ĉambro. Do mi postsekvis lin. Li iris al ŝtuparo al la dua etaĝo kaj supreniris. Li senhezite eniris en unu el du ĉambroj en la dua etaĝo. Tiun ĉambron ni kutime uzas dum nia restado. Kaj en la ĉambro li trovis la murŝrankon, kie li ŝatas kuŝi sur litaĵoj.
Mi miras, ke li ja bone memoras la ĉambron malgraŭ tio, ke li nur malofte vizitas ĝin.