Kategorio: Komputado

Prove mi instalis la esperantan literumilon por Fajrovulpo. La instalado mem estis tre facila. Simple alklaki la ligilon de instalo.
Kiam oni skribas en teksto-enigejo de iu retpaĝo, se oni tajpas esperantan vorton, kiu ne troviĝas en vortaro de la literumilo, tuj poste tiu vorto estas substrekita per ruĝa punktolinio.
La programo ŝajnas kontentige saĝa. En ĉi-supraj linioj ĝi trovis du mistajpojn kaj tri neregistritajn vortojn (literumkontrolilo, Fajrovulpo, enigejo). Do mi korektis la mistajpojn kaj ŝanĝis la vorton literumkontrolilo per literumilo (kiu troviĝis en la vortaro).
Oni ankaŭ povas registri novajn vortojn en la vortaro.
Gratulon kaj koran dankon al programistoj de la literumilo!

Antaŭ ol resendi mian surtablan komputilon al la fabrikinto por riparado, mi devas aranĝi mian tekkomputilon kiel anstataŭanton de la surtabla. Do mi instalis kelkajn programarojn en mia tekkomputilo.
Sed aperis problemo, ke la presilo konektita per loka reto mispresas dosieron senditan de la tekkomputilo. Pli ĝuste, mia tekkomputilo sendas misordonojn al la presilo. Mi malinstalis kaj reinstalis la presilan pelilon. Sed la problemo ne solviĝis. Hm, kion fari?

Hieraŭ DVD-aparato de mia surtabla komputilo paneis. Kiam mi enigas diskon en la aparato, post 2-3 sekundoj ĝi retroeligas la diskon. DVD-ROM, DVD-video, KD-ROM, KD-muziko… ĉiuj ne taŭgas.
Mi aĉetis la komputilon komence de ĉi-jaro. Do ankoraŭ en la garantia periodo. Mi skribis retletron al ĝia fabrikinto. Tiu ĉi respondis hodiaŭ, ke mi resendu per kuriera servo la tutan aparataron por ekzamenado kaj riparado.
Kiam DVD-aparato de mia tekkomputilo paneis en ĉi-majo, ĝia fabrikinto (granda kompanio) sendis servo-inĝenieron por ripari al mia hejmo. Estis tre oportune. Sed ĉi-okaze mi devas sendi la komputilon al la fabrikinto (malgranda kompanio).
Pro informsekureco, la fabrikinto deklaras, ke ĝi nuligos ĉiujn datenojn en la durdisko de mia resendota komputilo. Do, unue mi devas sekurigi miajn datenojn kaj agordaĵojn de la komputilo, kaj sekve paki la aparataron sekure por ne rompiĝi dum transportado. Estas ja ĝena kaj maloportuna maniero!

Temas pri la programlingvo Perl. Mi nun relernas Perlon.
Perlo estas relative facila kaj tre oporttuna lingvo por prilabori tekston. Unu el ĝiaj karakterizaĵoj estas tio, ke oni povas atingi celon per pluraj manieroj.
Hodiaŭ mi ekciis kelkajn specialajn variablojn: $` kaj $’ (pliantaŭa kaj pliposta subĉenoj ol identigita subĉeno).

  if ($s =~/io/) {
    $s = $` . 'alio' . $' ;
    # fari aliaĵojn ;
  }

En la supra ekzemplo mi anstataŭigas la subĉenon “io” en la signoĉeno $s per “alio”.

Mi nun faras aŭtomatan tekstorekonon per la programo OmniPage Pro 14. Ĝi kapablas bone trakti ankaŭ la ĉapelitajn literojn de Esperanto. Ĝi akceptas vortaron de uzanto por sia literumilo. Ju pli multajn vortojn ĝi posedas, des pli saĝe ĝi rekonas tekston. Mi estas pli-malpli kontenta pri ĝia rekon-kapablo. Sed ja multon mi devas postredakti por akiri senriproĉan tekston.

Hieraŭ min atingis likvakristala vidigilo per kuriera servo. Fabrikinto de la vidigilo jam publike anoncis anstataŭigon, ĉar oni trovis, ke eksternorma parto estis uzita en produktado.
Lunde mi telefonis al la fabrikinto. Merkrede mi ricevis la anstataŭaĵon. Mi anstataŭigis malnovan vidigilon per la nova. Mi pakis la malnovan vidigilon kaj telefonis al la kuriera servo. Vespere tiu vizitis min kaj kunportis la pakaĵon. Estis ĉio.
Kiel facila kaj oportuna maniero! Antaŭ dek jaroj afero ne iris tiel glate.
Tamen restas unu bedaŭrindaĵo. Tio estas unu ĉiamluma punkto meze de la nova ekrano.

Mikrosofto senpage liveras unu el siaj programadaj medioj, Visual C++ Express Edition. Mi prove instalis ĝin kaj kompilis unu el miaj malnovaj C-lingvaj programoj.
Jam de preskaŭ 10 jaroj mi ne tuŝis C(C++)-kompilion. Post du – tri horoj da provoj kaj eraroj mia malnova programo kompiliĝis bonorde. Min impresis tio, ke la nuna kompililo en la komenca agordo estas pli rigora pri tipoj kaj deklaroj ol la malnova kompililo, kiun mi uzis antaŭ 10 jaroj. Ŝajnas al mi ke oni celas al pli sekura programado.

Subite paneis LAN-sistemo de mia domo. La kaŭzo estis rompiĝo de kablo ekde enkursigilo en mia ĉambro ĝis kluza enkursigilo, kiu konektiĝas al modemo. En mia ĉambro pere de la enkursigilo interkonektiĝas miaj komputiloj, durdisko kaj presilo. Dum la paneo mi ne povis aliri al la durdisko, kie mi deponas miajn ĉiutagajn datenojn. La aparatoj en mia ĉambro interkonektiĝas fizike tute senprobleme, sed ili ne povas interkominikiĝi. Ĉar la kluzo kun rompita konekto funkcias ankaŭ kiel DHCP-servilo, do la aparatoj en mia ĉambro ne scias reciprokajn IP-adresojn por komunikiĝi.
Provizore mi ŝanĝis la rompitan kablon per nova kablo. Mia LAN-sistemo refunkcias bonorde.

Lastatempe oni dissendis per Ret-info la novaĵon pri fondiĝo de “E-societo por Linukso kaj Libera Programaro”. Ĝia retpoŝta listo troviĝas ĉe http://groups.google.com/group/eliberaprogramaro.
Hodiaŭ mi partoprenis en la grupo. Nun ĝia membraro nombras 77. Kvankam mi nun uzas Vindozon, mi opinias, ke Linukso kaj Libera Programaro estas nepre subtenindaj.

Hodiaŭ min vizitis servo-inĝeniero komisiita de komputil-kompanio por ŝanĝi la DVD-aparaton de mia tekkomputilo, kiu fojfoje misfunkciis.
Antaŭ semajno mi telefonis al servocentro de la kompanio. Mi parolis kun konsilanto de la centro kaj li proponis, ke oni sendu inĝenieron al mia domo por ŝanĝi la DVD-aparaton. Tio estas tre oportuna rimedo por mi, ĉar mi povas daŭre uzadi la tekkomputilon.

Ĝis nun en ordinara okazo mi devis sendi kompleton de mia komputila aparataro por ripari ĉe la fabrikinto. Dum riparado, ĉirkaŭ semajnon, mi ne povis uzi mian komputilon. Estis tute maloportune.

La inĝeniero ŝanĝis la DVD-aparaton kaj ekzamenis funkciadon. Entute ni bezonis nur duonhoron. Post la ŝanĝo mia tekkomputilo funkcias senprobleme ankaŭ en reproduktado de DVD-filmoj. Oni komencis ja bonan servon!