Monato: Marto 2006

Sakuro ekfloras

floroj de sakuro

Hodiaŭ mi preteriris la sakuron ĉe la proksima hospitalo. Nun ekfloras dudek aŭ tridek procentoj de la florburĝonoj de la tuta arbo.
Vento malvarma blovas tre intense. Sed la floroj forte alteniĝas kaj eĉ unu petalo ne disiĝas de la branĉo. Mi ja miras pri ĝia vivoforto.
En kelkaj tagoj la sakuro plenfloros. Kaj tiam printempo atingos la kulminon.

Leŭkojo — neĝofloko floras

leÅkojo - neĝofloko

Jen estas novulo en mia ĝardeneto. La folioj similas al nariciso, kaj la floroj similas al konvalo. Estas unike, ke verda makulo torviĝas sur ĉiu petalo.
Kio estas ĝia nomo? Mi konsultis tri ilustritajn gvidlibrojn pri japanaj plantoj, sed mi ne povis trovi respondon. Mi konsultis ankaŭ ilustritan gvidlibron pri ĝardenplantoj, kaj fine trovis ĝin.
Ĝia nomo estas leÅ­kojo [Leucojum aestivum] aÅ­ neĝofloko el la angla “snowflake“. Ĝi estas plurjara herbo el amarilidacoj.

Vintro revenis

Hodiaŭ matene tondris kelkfoje, kaj ekpluvis kun forta vento. Tio nin tute surprizis.
Laŭ raporto de la loka meteologia observejo, temperaturo de la aero estis 16 gradoj celsiaj je la 11-a horo kaj estis 10 gradoj je la 12-a horo (tagmezo). Estas mirinde, ke temperaturo malaltiĝis je 6 gradoj nur en unu horo! Frosta aermaso nun kovras Japanion.
Pluvo kaj vento daŭris intermite. Kaj nuna (je la 23-a horo) temperaturo estas 6 gradoj celsiaj, kio estas ja vintra temperaturo.

Cimo en PHP 4.4.2

Antaŭ semajno mi parolis pri instalo de PHP k.a en mia komputilo. La instalo. mem estis sukcesa, sed aplika programo, kiun mi verkis en PHP, ne funkciis. Ĝi eĉ paneigis la servoprogramon Apaĉo!
Tiu sama programo funkciis senprobleme en eksa PHP 5.0.2 de mia komputilo kaj en PHP 4.4.2 de la gasta komputilo.
Mi hakis la fontoprogramon, kaj trovis, ke io malbona okazas ĉe malfermo de dosiero.
    $fp = fopen($url, “r”);
    [kie $url=”http://ekzemplo.com/dosiero.txt”]

Mi esploris koncernajn artikolojn per Guglo, kaj atingis similan okazon en iu diskutlisto. Tie oni parolis pri eventuala cimo de PHP mem, kaj montris utilajn ligojn. Tial mi elŝutis plej freŝan version de PHP ĉe “PHP Snapshots“, kaj instalis ĝin en mia komputilo.
Brave! Nun ĉio estas en ordo! Mia programo funkcias senprobleme kiel antaŭe.

Hajko de hodiaŭ

spireo - neĝosaliko

    ne konfidenci
    mi decidis finfine —
    neĝosaliko

neĝosaliko: specio de spireo [Spiraea thunbergii] el rozacoj; falfolia arbusteto, kiu portas malgrandajn foliojn similformajn al tiu de saliko kaj havas multajn neĝblankajn floretojn en marto kaj aprilo.

Palaco de daimio

palaco de daimio

Hodiaŭ mi kaj mia edzino vizitis la historian muzeon de la kastelo de Saga.
En la antaŭlasta jaro oni restaŭris la palacon en la centra cidadelo de la kastela tereno. En la palaco oni eksponas historiaj dokumentoj kaj objektoj pri la feŭda regno de Saga en Edo-epoko [1603 – 1867].
Enestas multe da ĉambroj vastaj kaj altplafonaj. Mi pensis, ke estus tre malvarme en vintro eĉ kun tiamaj hejtiloj.

Egretobulo de leontodo

egretobulo de leontodo

Hieraŭ mi trovis egretobulon de leontodo en mia ĝardeneto. Ĝi estas kapitulo de egretohavaj semoj (akenoj).
Kiam mi estis infano, mi ofte ludis blovante ĝin. Estis amuzo al mi, ke la semoj kun egreto disflugas per agrabla venteto.
Egretobulo nomiĝas “watage” (kotonhararo) en la japana lingvo. “Clock” (horloĝo) en la angla. “Pusteblume” (spirfloro) en la germana. Kiel ĝi nomiĝas en aliaj lingvoj?

Ugviso kantas mallerte

Hodiaŭmatene mi aŭdis, ke ugviso kantas ie en najbaraĵo. Dum kelkaj jaroj mi ne aŭdis ĝin. Tial mi estas tre ĝoja pro aŭskulti la ugvison.
Ugviso [Cettia diphone] estas birdo, kiu anoncas printempon per sia bela kanto. Ĝi ordinare kantas “Hooo hokekjo!” Tiu longa “Hooo” estas la karakterizaĵo de ĝia kanto.
Sed la hodiaŭa ugviso ripetas nur “Hokekjo hokekjo!” “Ho, ĝi kantas mallerte!” diris mia edzino.