Mi sukcese promociis mian blogon al WordPress 2.1 jam antaŭhieraŭ. Hieraŭ kaj hodiaŭ mi ekzamenis, ĉu la kromprogramoj bone funkcias en la nova versio.
Ja certe kelkaj kromprogramoj misfunkcias aŭ ne funkcias. Mi devas pripensi kiel solvi la problemojn.
Aprila temperaturo
La maksimuma temperaturo de hodiaŭ estis 16,9 gradoj en mia regiono. Tiu ĉi estas cifero de april-komenco de ordinara jaro.
Dum la tago estis serene kaj sunbrile. Kaj ĉi vespere mi ne bezonis superveston.
Jen floras umearbo, kiu staras en la sama strato de mia domo.
Jen WordPress 2.1
Finfine mi sukcesis!
Jen vi vidas mian blogon motoratan pere de WordPress 2.1 esperantigita de Bertilo Wennergren.
La kaŭzo de mia antaŭa malsukceso estus misfunkcio de la FTP-programo sur mia nova komputilo. Mi povis senprobleme alŝuti ĉiujn dosierojn pere de la sama FTP-programo sur mia malnova tekkomputilo.
Post la alŝuto mi faris jenajn:
5. Aliri al la blogo kaj eniri en la administran paĝon.
6. Fari promocion laŭ instrukcioj.
7. Reaktivigi kromprogramojn.
8. Modifi du dosierojn sidebar.php kaj style.css laŭ la antaŭa versio kaj alŝuti ilin.
Jen estas ĉio.
Malsukcesa promocio
Hodiaŭ mi provis promocii WordPress-on al la versio 2.1 esperantigita de Bertilo.
Jen mia metodo:
1. Mi faris restaŭrkopion de la datumbazo.
2. Mi haltigis ĉiujn kromprogramojn.
3. Mi malkompaktigis la dosieron WordPress_2.1_Esperanto.zip.
4. Mi alŝutis ĉiujn dosierojn al la servilo.
Sed mi malsukcesis ĉe alŝuto de la koncernaj dosieroj superskribe al la dosierujo de la servilo, kie ekzistas la malnova versio 2.0.5. Meze de la alŝutado, post alŝuto de kelkaj dosieroj, la servilo ne resendas rekonan mesaĝon al mia FTP-programo, kiu perdas konekton al la servilo. Ĝis nun mi ne spertis tian misfunkcion. Hmmm… Kion fari?
Problemo de Fajrovulpo 2.0
En mia nova komputilo mi instalis la novan version 2.0 de Fajrovulpo (Firefox). Ĝenerale ĝi bone funkcias kaj plaĉas al mi.
Sed mi trovis unu problemon, ke ĝi vidigas ĉi tiun retpaĝon de Radio Polonia malsame ol la versio 1.5.
Pere de Fajrovulpo 1.5 en tiu paĝo aperas linio “Elŝutu” kaj piktogramo de laŭtparolilo por ĉiu elsendo. Sed pere de Fajrovulpo 2.0 ne aperas la linio “Elŝutu” nek la piktogramo. Tial mi ne povas elŝuti la plej freŝdatan sondosieron pere de Fajrovulpo 2.0. Kio kaŭzas la misprezenton?
Mi fuŝis
Ho ve! Mi fuŝis en instalado de OED (Oxford English Dictionary) V3.1 al mia nova komputilo. Mi ne sciis, ke ĝi ne bone funkcias kun virtuala KD-legilo. Nun la serĉprogramo de OED startas nur unu fojon en ĉ. 10 alklakoj. Tute maloportune!
Mi retpoŝte demandis la vendkompanion pri eblaj rimedoj por reordigi. Mi esperas, ke ili bonkore respondos.
Go-ludo kontraŭ komputilo
Mi kaj mia edzino malofte ludas goon. Kiam ŝia malnova komputilo enhavis go-programon, ŝi fojfoje ludis goon (9×9-linian) kun la komputilo. Post mekanika difektiĝo de tiu malnova komputilo ŝi ne povis ludi goon, ĉar ŝia nova komputilo ne enhavis go-programon.
Hodiaŭ mi aĉetis por ŝi go-programon relative malmultekostan. La programo lerte ludas en agordo de meza nivelo, kiu estas nur iomete malpli lerta ol mi. Mia edzino ludis kaj estis venkita de la programo de komencanta nivelo. Tamen ŝi ĝuis la go-ludon.
Dua bulteno de 92-a UK
Antaŭ kelkaj tagoj atingis min la dua bulteno de la 92-a Universala Kongreso de Esperanto en Jokohamo. Mi certe partoprenos en ĝi.
Nun mi pripensas, kion fari pri mia loĝado dum la kongreso. Ĉu elekti el la hoteloj en la mendilo? Sed triono de ili estas tre multekosta por mi. Kaj malpli kostaj hoteloj estu por eksterlandaj gastoj.
Ĉu tranokti ĉe mia frato en Tokio, iom malproksime de la kongresejo? Ĉu serĉi alian hotelon malpli kostan, — sed kiel?
Mia pripensado daŭros.
Eksterordinare varma vintro
Hieraŭ la minimuna temperaturo estis 5,5 gradoj en mia regiono. Kaj la maksimuma temperaturo estis 18,1 gradoj.
Hodiaŭ la minimuma estis 5,7 gradoj. Kaj la maksimuma estis 16,6 gradoj, kiu egalas al tiu de komenco de aprilo en ordinara jaro.
Ja estas eksterordinare varma vintro!
Klona bovo, ĉu “organika”?
Laŭ japana ĵurnalo, en Usono oni diskutas pri tio, ĉu viando el klona bovo estas “organika” manĝaĵo aŭ ne. Organika bovo estas bredata per nutraĵoj el organika agrikulturo, kaj ne estas donita per kreskigaj hormonoj.
Do, kia estas klona bovo en organika bredado? FDA (la usona administracio pri manĝaĵo kaj medikamento) asertas, ke jes. Sed usonaj konsumantoj kontraŭas organikan klonan bovon.
Mi pensas, ke agnoski organikan klonan bovon estas tute kontraŭnatura kaj danĝera.