Ĝis nun mia blogo akceptis de-eksterajn menciojn (trackbacks). Sed en ĉi tiuj dek tagoj nombro de spamaj mencioj superis kvincent. Tial mi decidis, ke la blogo ne akceptu de-eksterajn menciojn.
Kvankam mi ŝanĝis la agordaĵon kaj rekonstruis la blogon, la indiko de mencioj [trackbacks] restas en ĉiuj paĝoj same kiel antaŭe. Kiamaniere oni povos forigi tiujn indikojn. Mi devas esplori plu.
Hajko de hodiaŭ
gazetpapero
faras sonon pli sekan —
vintro ĵus ekis
Vintra preludo
Subite estis malvarme hodiaŭ. La matena minimuma temperanturo estis 12 gradoj kaj la maksimuma 14 gradoj. Hieraŭ la minimuma 15 kaj la maksimuma 19 gradoj.
Ekde hieraŭ intense malvarma aermaso el Siberio trapasas super Japanio. Nun loka meteologia observejo raportas, ke la temperaturo estas 10 gradoj. Laŭ veterprognozo morgaŭmatene minimuma temperaturo estos 6 gradoj.
Hodiaŭ estas la unua tago de vintro laŭ la japana kalendaro. Efektive hodiaŭo indas esti nomata tiel.
Alia uzmaniero de “wget”
Mi antaŭe skribis pri la uzado de “wget [vavoget]”.
Lastatempe mi uzas la opcion “-i”, kiu indikas dosieron, en kiu estis vicigitaj URL-oj. Ekzemple
—————————————————-
wget -O foo.txt -i url.txt
—————————————————-
Kaj la dosiero “url.txt” estas jena:
—————————————————-
http://www.bar.com/indekso.php?id=11
http://www.bar.com/indekso.php?id=12
…..
http://www.bar.com/indekso.php?id=19
—————————————————-
Rezulte de la komando, ĉiuj elŝutitaj datumoj kolektiĝas en la dosiero “foo.txt”. Kiam la opcio “-O” ne estas aldonita, tiam la elŝutitaj datumoj fariĝas apartaj dosieroj.
Stranga fluginsekto
Mi trovis strangan malgrandan insekton en mia ĝardeneto. Maldika korpo kaj maldikaj flugiloj (ĉ. 2 cm da malfalda longo) formas T-literon en starado.
Konsultinte retpaĝojn, mi eksciis, ke ĝi estas speco de pteroforedoj [Pterophoridae] el lepidopteroj. En la japana lingvo oni nomas ĝin “tori-ba-ga (鳥羽蛾)” t.e. “pluma noktopapilio”.
Aŭtuna festo
Hieraŭ kaj hodiaŭ okazis aŭtuna festo “kunĉi (供日)” en mia naskiĝurbo. Tio estas festotagoj de loka ŝintoa templo. Tamen al multaj homoj ĝi ne estas religia evento, sed simpla aŭtuna festo.
La plej alloga okazaĵo en la festo estas rondiro de 14 festoĉaroj en la malnovaj kvartaloj de la urbo. La festoĉaroj en la formo de legendaj leonoj, samurajaj kaskoj, pagro, martestudo ktp, estis faritaj el papero, lako kaj ligno en la jaroj 1819 – 1876.
Stimulaj krioj “En-ja! En-ja!” de la portantoj kaj akompana muziko de tamburego kaj flutoj ĉiam entuziasmigas spektantoj. Ankaŭ mi kaj mia edzino ĝuis la feston.
Hajko de hodiaŭ
kiel ĉapeloj
farfugiaj folioj
por ŝtona budho
*****
farfugio: Farfugium japonicum (sin. Ligularia tussilaginea), specio el asteracoj, kun dikaj glaceaj renofromaj folioj el radiko, portas kapitulojn de flavaj langetaj koroloj en oktobro – decembro.
Aŭtuna bonodoro
Kiam mi trairis la korton de la hospitalo proksima de mia domo, mi trovis oranĝoflavajn floretarojn de “ora osmanto [Osmanthus fragrans var. aurantiacus]”. Dolĉeta bonodoro karesis mian nazon.
Ora osmanto devenis de Ĉinio. Ĝi estas dioika, t.e. portas florojn de nur unu sekso, vira aŭ ina, sur unu individuo. Laŭ libroj, oraj osmantoj en Japanio, preskaŭ ĉiuj estas virseksaj kaj neniam portas fruktojn.
Hajko de hodiaŭ
ho, krizantemoj —
junaj kaj maljunaj en
festa muziko
Flormuŝo ĉe kampa krizantemo
La kampa krizantemo jam komencis flori en mia ĝardeneto.
Hodiaŭ vizitas tiujn florojn kelkaj flormuŝoj. Unu estas svelta flormuŝo [Episyrphus balteatus]. Ĝi flugas tien kaj reen, ŝvebas ĉirkaŭ la floroj dum minutoj. Kaj fine ĝi alkroĉiĝas al la petaloj per la piedoj kun polenoj. Laŭ informo de iu retpaĝo ĝi estas viro, ĉar la du facetokuloj kuntuŝiĝas.