Antaŭe mi skribis artikolon pri akvomelona floro. De tiam pasis monato. Jam kelkdek floroj kaj floris kaj ŝrumpis. Tri el ili nun fruktas.
Vidu la foton. La juna frukto estas malgranda je ĉ. 3 cm, sed jam havas la karakterizajn striojn sur la ŝelo. Mi kaj mia edzino tre ĝojas kaj antaŭĝuas maturiĝon de la fruktoj.
Kiam mi paŝis en mia ĝardeneto, io malgranda eksaltis kaj forflugis ĉirkaŭ miaj piedoj. Mi serĉis sur la tero, kaj trovis helbrunan akridon. Estis malfacile eltrovi ĝin sur la tero, ĉar ĝi sin kamuflis tre lerte. Ĉu vi povas distingi la akridon en la foto?
gruzakrido: Eusphingonotus japonicus, specio el akridedoj, longa je ĉ. 3 cm, vivas ordinare en seka riverujo. Oni nomas ĝin en la japana lingvo “kawara-batta (河原飛蝗)” t.e. “akrido en seka riverujo”,
Hodiaŭ estas la 61-a datreveno de la atombombado en Nagasako. En la Paca Parko de la urbo Nagasako okazis la pacmemora ceremonio. En la ceremonio reprezentanto de la atombombitoj, 82-jara virino, deklamis sian ĵuron por paco.
21-jaraĝa ŝi estis atombombita ĉe 5,8 km de la eksplodcentro, kaj post 3 jaroj naskis la duan filon, kiu tamen mortis pro leŭkemio antaŭ 3 jaroj en sia 55-a jaro. Kuracisto asertis, ke la leŭkemio de la filo estis heredaĵo de la patrino atombombita. Ŝi ankoraŭ nun suferas pro lia morto.
Nun ŝi havas fortan volon, ke ŝi devas sciigi al junaj generacioj stultecon, teruron kaj kruelecon de la milito. Ŝi deziras, ke la mondo fariĝu paca dum ŝi vivas.
Trarigardante la resuman ĵurnalon de la gastiga komputilo de mia retejo, mi rimarkis, ke la eraro 403 (Forbidden/Malpermesite) multiĝas eksterordinare en julio kaj aŭgusto. Mi do detale ekzamenis lastajn kelkajn tagĵurnalojn, kaj trovis, la eraroj okazis ĉe la programo “/mt3/mt-tb.cgi”.
Mi eksciis, ke mia blogo ricevadas serion da spamaj retrospuroj (trackbacs) dum lastaj kelkaj monatoj, kaj ke la kontraŭ-spama funkcio de la nuna versio de MovableTyoe tre efike baras la publikiĝon de tiuj spamoj.
Hodiaŭ mi kaj mia edzino spektis la animacian filmon “Rakontoj el Termaro”. Mi impresiĝis pri belaj bildoj de la filmo, same kiel de antaŭaj verkoj de Studio Ghibli.
Mi pensas, ke la scenaro bone respegulas kaj rekreas la originalan mondon de Le Guin. Kelkaj kritikistoj kritikas la filmon, dirante ke en la filmo mankas grandaj movoj, kiuj karakterizis la animaciajn filmojn de MIYAZAKI Hayao. Sed mi opinias, ke la kritiko mistrafas, ĉar la mondo de Le Guin estas plena de internaj luktoj aŭ konfliktoj. La filmo de MIYAZAKI Goro lerte rekreas la atmosferon de la originala verko.
Mi kaj mia edzino estas kontentaj pri la filmo.
Hodiaŭ estas la tago, kiam japanoj rememoras la atombombadon de Hiroŝimo. En la Paca Parko de la urbo Hiroŝimo oni okazigis la pacmemorigan ceremonion 2006. Televida stacio simultane elsendis la ceremonion ekde la 8-a atm. Kaj je la 8-a kaj 15 minutoj, en la momento de eksplodo de la atombombo, oni dediĉis unu minuton da silenta preĝo al ĉiuj atombombaj viktimoj kaj al ĉiuj militaj viktimoj.
Ankaŭ en mia urbo la urba oficejo funkciigis la sirenon en la sama horo same kiel aliaj municipoj. Ankaŭ mi dediĉis unu-minutan silentadon. Aldonendaj ĉi-foje estas militviktimoj en Libano kaj Israelo, mi pensas.
* Paca Deklaro de Hiroŝimo
* Hirosima Esperanto-Societo
Hodiaŭa maksimuma aertemperaturo estis 35 celsiusgradoj en mia regiono. Oni mezuras aertemperaturon per termometro en kesto (t.e. en ombro), kiu altas je 1,5 m super la tero.
Sed homoj sub la suno sentas pli da varmo. Mi prove metis termometron sub la sunradioj. Je la tagmezo ĝi indikis pli ol 50 gradojn! Je la 4-a ptm ĝi indikas 47 celsiusgradojn (la foto). Certe estas tre varmega.
En la lasta dimanĉo mi bonŝance trovis libelon ripozanta sur elektra kablo en arbareto. Ŝajnas al mi, ke ĝi pozas tre elgante.
Ĝi estas femalo de Orthetrum triangulare melania, specio el libeloj (la ordo odonato). Japanoj nomas ĝin “oo-siokara-tonbo (大塩辛蜻蛉)” t.e. “granda pekla libelo“, ĉar matura masklo de ĉi tiu specio kovriĝas je la abdomeno per blublankaj pulvoroj kiel salo.
Hodiaŭ mi kaj mia edzino surpriziĝis trovinte ne-kutime grandan akridon en nia ĝardeneto. Ĝia korpo longas je preskaŭ 10 cm. Ni neniam ĝis nun vidis tiel dikan akridon ĉirkaŭ nia domo. Pro ĝia dikeco mi pensas, ke ĝi estas femalo de ulambana akrido .
ulambana akrido : Acrida chinerea, specio el akridedoj, kies kapo estas konusa kun du glavformaj antenoj, kaj kies korpo estas longa je 4 cm (masklo) aŭ 8 cm (femalo). Tre longaj kaj fortikaj postaj kruroj karakterizas ĝin.
Ĉar ĝi aperas ofte ĉirkaŭ la tagoj de ulambano (t.e. en aŭgusto), japanoj nomas ĝin “syouryou-batta (精霊蝗)” t.e. “ulambana akrido”.
Hodiaŭ, la unua merkredo de ĉiu monato, estas tago por kolekti uzitajn metalaĵojn en mia urbo. Oni devas enmeti ladskatolojn ferajn kaj aluminiajn en grandan retsakon distribuitan de la urba oficejo. Kaj aliajn metalaĵojn oni povas enmeti en konvenajn sakojn.
Jen la retsako estas lokita fronte al mia domo. Miaj najbaroj metas siajn ladskatolojn en la sakon. Ĝis la tagmezo teamo da urbaj laboristoj forportas ilin per ŝarĝaŭto.