post pluvo
en friska aero
sur verda rubando de herbofolio
jen gemoj ŝutitaj
pluveroj kristaliĝintaj el la ĉielo
belo en la naturo
belo sen arto
Gemoj post pluvo
Hajko de hodiaŭ
suna en cujo —
vigle muĝetas kato
kaj lavmaŝino
—
Ni ĝojas kelkajn sunajn tagojn en la longa pluvsezono.
Foti pluvon
Foti pluvon estas malfacile al ordinara homo kun ordinara fotilo. Mi ne sukcesis montri sur foto liniojn de falantaj pluveroj.
Do anstatŭe mi fotis flakon kun ondocirkloj faritaj de pluveroj. Sed tiuj ondocirkloj ne estas klare videblaj sur la foto. Ĉu oni sentus falantajn pluverojn per la foto?
Estas malfacile al mi foti tiel same, kiel mi vidas. Foti pluvon estas ja malfacile.
Mia kato resaniĝis
Mia amata kato Bii preskaŭ resaniĝis. Ekde antaŭhieraŭ li manĝas kvante kiel kutime, kaj saltas alten sur bretojn. Ĉiuj familianoj estas ĝojaj kaj trankvilaj pro lia resaniĝo.
La bestkuracisto konsilis, ke la kato ne promenu ekster domo por teni sanan staton. Tial Bii ne povas eliri por patroli ĉirkaŭ la domo. Li ŝajnas esti malkontenta pri tio, kaj fojfoje miaŭas proteste kontraŭ ni. Por konsoli lin, ni fojfoje ludas kun li per pilkoj kaj aliaj ludiloj.
La kolombido forlasis la neston
Daŭrigo de la artikolo pri la ido de orienta turto.
Hodiaŭ matene mi estis antaŭ la pordo de mia domo por foti pluvtagajn vidaĵojn. Tiam subite mi aŭdis flugsonon tuj apude.
Mi ne vidis, ke la turtido forflugas. Sed la nesto estis malplena. Mi serĉis la turtidon, sed ne trovis ĝin. Post momento mi vidis, ke turto traflugas tra la strato antaŭ mia domo. Kaj ĝin sekvis alia turto. Ŝajnis al mi, ke ili estas la turtido kaj la gepatra turto.
Vespere la nesto estis plu malplena. Do la turtido fine forlasis la neston, mi pensas. La ido kreskis kaj maturiĝis pli rapide, ol mi antaŭvidis. Mi nun deziras, ke la turtoj fartu bone.
La kolombido defalis duafoje
Daŭrigo de la artikolo pri la ido de orienta turto.
Hodiaŭ, kiam mi estis en la laborejo, mia edzino leteris al mi poŝtelefone. La turtido ekflugis postsekvante la gepatran turton, sed ĝi falis teren pro manko de flugforto. Ĝi ne povis reiri al la nesto.
Reveninte hejmen, mi tovis la turtidon staranta sub apuda arbo. Mi klopodis kapti ĝin, kiu plurfoje forflugis eliĝinte el sub miaj manoj. La ido povas flugi nur 2 – 3 metrojn. Ĝi ankoraŭ ne povas regi sian flugon.
Post kelkaj mistrafoj, fine mi kaptis la turtidon, kaj remetis ĝin en la neston. Mi diris al ĝi, “Stulta infano, gardu vin pli bone! Kaj ne falu la trian fojon!”
La unua floro de farbito
En la lasta majo mia edzino semis farbitojn, pri kies ĝermoj mi jam skribis.
Hodiaŭ matene unu el la farbitoj ekhavas la unuan floron en tiu ĉi somero. Mi kaj mia edzino estas tre ĝojaj. La farbitoj plezurigos nin per la diversnuancaj floroj ĉiumatene dum la venontaj kelkaj semajnoj.
Ni esperas, ke ankaŭ preterpasantoj plezuriĝu per la farbitaj floroj.
La kolombido kreskas
Daŭrigo de la artikolo pri la ido de orienta turto.
La turtido kreskas pli kaj pli. Hodiaŭ mi trovis, ke ĝi jam elŝovas la voston el la nesto. Kvankam ĝi ankoraŭ portas lanugajn harojn sur la kapo kaj la korpo, ĝia trajto estas ne infana, sed jam junula.
Hajko de hodiaŭ
turtido atendas
kun nigraj okuletoj
en verda pluvo
Floro de akvomelono
En la lasta majo mia edzino aĉetis plantidon de akvomelono kaj plantis ĝin en nia ĝardeneto. Nun ĝi portas unu flavan floron. Laŭ libroj akvomelono portas virajn florojn kaj inajn florojn sur unu volvotigo. Do ni bezonas plurajn florojn virajn kaj inajn por ke ni povu rikolti fruktojn de akvomelono.
akvomelono: Citrullus vulgaris, unujara grimpherbo el kukurbacoj, kies globa frukto estas dolĉa kaj sukoplena.