Fojfoje mi uzas programojn en komandolinia interfaco, kiam mi prilaboras tekstodosierojn en komputilo. Kiam mi uzadis DOS-on, mi ofte faris komandodosieron kaj plenumis serion da komandoj per kelklitera tajpado.
Nun kiel uzanto de Vindozo, mi multe forgesis regulojn pri la komandodosiero. Mi devas relerni pri detaloj. Jen estas noto por mi mem.
Daŭrigi legi Noto pri komandodosiero
Ruĝeta oksalido
En mia ĝardeneto tie kaj tie floras flavaj oksalidoj [Oxalis corniculata] jam de kelkaj semajnoj. Kaj nun tie kaj tie elkreskas ruĝetaj oksalidoj [Oxalis corymbosa] apud flavaj oksalidoj. La floroj kaj la folioj de ruĝetaj oksalidoj estas pli grandaj ol tiuj de flavaj oksalidoj.
Kiam mi estis infano, mi ludis per ĝia longa petiolo (10 – 20 cm) kun tri folieroj. Oni elŝeligu internan fibron el la petiolo kun folieroj. Kiam oni prenas la finon de la fibro kun folieroj, ĝi similas al pendolo. Du ludantoj interkroĉu la fibrojn kun folieroj kaj tiru sian fibron. Tiu, kiu tranĉis la alian fibron, estas venkinto.
Oksalido el betonmuro
Kelkfoje mi sentas, ke plantoj estas pli lertaj je vivtenado ol bestoj. Ekzemple tiu ĉi oksalido kreskas el malgranda terpeceto en fendeto de betonmuro. Ĉiam mi miras pro la vivforto de la herboj.
La oksalido estas Oxalis corniculata, plurjara herbo el oksalidacoj. Flavaj 5-petalaj floroj kaj 3-folieraj kunmetitaj folioj estas ĝiaj karakterizaĵoj.
Hajko de hodiaŭ
hirundo tranĉas —
nuba ĉielo signas
pluvon baldaŭan
Lacerto ripozas
Mi trovis lacerton ripozanta sur tabulo de la ŝtuparo por la kato. Ĝi estas takidromo.
Ĝi pozadis tute senmove dum mi alproksimiĝis kaj fotadis ĝin. Supozeble ĝi ripozis kaj sunumis sin sur la ŝtupo.
Manko en ciferecaj fotiloj
En la artikolo pri ĉina klematido mi skribis, ke la foto ne povis respeguli la koloron de tiu floro.
Mi esploris la kaŭzon kaj trovis la respondon.
1. Homaj okuloj sentas violkoloron de objekto en du apartaj manieroj. Kiam la objekto eligas violkoloran monokromatan lumon, kies ondolongo estas ĉ. 400 nm (nanometroj), la homa okulo sentas puran violkoloron. Kaj kiam la objekto eligas ruĝan (ĉ. 700 nm) kaj bluan (ĉ. 450 nm) lumojn egalintensajn, ankaŭ tiam la homa okulo sentas miksitan violkoloron. La homa okulo ne distingas puran kaj miksitan violkolorojn. Ili estas same violkolora al la homa okulo.
2. Nuna cifereca fotilo (CCD – lumricevilo) akceptas lumon de objekto tra trikoloraj filtriloj (ruĝo, verdo kaj bluo). Ili akceptas ne nur lumon de tipa ondolongo sed ankaŭ lumojn de ĉirakaŭaj ondolongoj. Tial la fotilo povas prezenti ne nur tri kolorojn sed ankaŭ flavon kaj aliajn kolorojn per trikolora miksaĵo.
3. Sed la pura violkoloro (400 nm) estas sentata nur per blua filtrilo. Verda kaj ruĝa filtriloj preskaŭ ne sentas tiun ondolongon. Tio ĉi estas fizika karakterizaĵo de la lumricevilo. Ĉi-okaze la violkoloro de la objekto fariĝas bluo en la fotilo.
4. Konkludo: Oni vidas violkoloron en cifereca fotilo, kiam la objekto eligas miksitan violkoloron. Sed oni vidas bluon en cifereca fotilo, kiam la objekto eligas puran violkoloron. Jen estas manko de nuna cifereca fotilo.
Acera frukto
Foje la naturo surprizas nin per simpla belaĵo. Jen estas foto, kiu montras frukton de acero. La helruĝaj makuletoj inter verdaj folioj tre plaĉis al mi.
Ĝia formo similas al du-ala helico. Fakte ĝi ekflugos pro vento, kiam ĝi maturiĝos post monatoj.
La acero supozeble estas Acer palmatum, tre populara specio en Japanio.
Hajko de hodiaŭ
pluvas kaj pluvas —
blankaj floroj stirakaj
tintas sen sono
japana stirako: specio [Styrax japonicus] el stirakacoj, falfolia arbeto kun blankaj floroj grapole pendantaj de branĉeto en frua somero.
Krona filadelfo
Hodiaŭ mia patrino vizitis ĝardenbutikon. Mi akompanis ŝin per mia aŭto.
En la vasta tereno de la butiko troviĝas multaj plantoj kaj plantidoj. Oni vendas ankaŭ diversajn potojn, humojn kaj sterkojn.
Ŝi aĉetis poton da krona filadelfo, kies blankaj floroj similas al tiuj de umeo.
krona filadelfo: specio [Philadelphus coronarius] el hidrangeacoj, falfolia arbusto kun blankaj 4-petalaj floroj en frua somero.
Ĉina klematido
Mia patrino amas kulturi ĝardenajn plantojn. Ŝi kulturas diversajn florojn.
Nun floras grandaj belaj floroj de ĉina klematido. Ĝiaj sepaloj, kvazaŭ petaloj, fakte estas okulfrape purpuraj. Sed domaĝe la foto ne povis respeguli la belan koloron.
ĉina klematido: specio [Clematis florida] el ranunkolacoj, plurjara grimpa herbo, kies floro estas sen petalo sed kun ses sepaloj blankaj aŭ purpuraj.