lago pli vasta
hodiaŭ ol hieraŭ —
birdoj reiris
*****
Migraj birdoj, ekz. cignoj, sovaĝaj anseroj ktp, kiuj travintris en Japanio, reiras norden al Siberio en printempo.
Enigi ĉapelitajn literojn
Mi aldonis rimedon enigi ĉapelitajn literojn en serĉ-fenestro, nom-fenestro kaj koment-fenestro de ĉi tiu blogo.
[v] cx gx … ux => ĉ ĝ … ŭ
Kiam la kvadrateto estas markita, tiam oni povas enigi “ĉ” per “cx”, “ĝ” per “gx” kaj tiel plu. Se oni ne volas aŭtomatan anstataŭigon, tiam oni musklaku sur la kvadrateto kaj malŝaltu la funkcion.
Do, bonan ĉapeladon!
Pupoj kaj pendaĵoj
Jam pasis la 3-a tago de marto, t.e. la tago por pupfesto. Tamen en mia urbo oni ankoraŭ ekspozicias pupojn sur ŝtupara podieto en publikaj lokoj por turistoj. Ĉirkaŭ mia urbo estas la tradicio ornami ĉirkaŭ pupa podieto per pendaĵoj [sage-mon], mobiloj kun kudritaj pupetoj. De antaŭ pli ol ducent jaroj patrinoj kaj avinoj kudris pupetojn por pendaĵo dezirante bonon kaj feliĉon de siaj filinoj kaj nepinoj. Turistoj povas spekti pupojn kaj pendaĵojn en diversaj lokoj de la urbo ĝis la komenco de aprilo.
Ciferecigi paperan vortaron
SAT (Sennacieca Asocio Tutmonda) eldonis la grandan Esperanto-vortaron PIV (Plena Ilustrita Vortaro de Esperanto 2005). Laŭ Vilhelmo LUTERMANO (la artikolo ĉi tie) SAT ne volas ciferecigi PIV-on t.e. eldoni ĝin en kompakta disko uzebla per komputilo, timante ke ĝia cifereca eldono malutilos kontraŭ la enspezo de SAT pro eventualaj senpagaj kopiadoj.
JEI (Japana Esperanto-Instituto) eldonis la Esperanto-Japanan Vortaron (2006) kaj ĝis nun ne eldonas ĝin en cifereca formo. Onidire JEI argumentas tute same al SAT.
Mi kontraŭas senpagan kopiadon de cifereca vortaro, malsame al Lutermano, ĉar SAT kaj JEI rajtas akiri monon per la vortaroj. Sed mi ege bedaŭras, ke SAT kaj JEI ne eldonas ciferecan vortaron. Nuntempe mi preskaŭ ne uzas paperajn vortarojn de la japana kaj la angla lingvoj. Mi uzas nur ciferecajn enciklopediojn en mia komputilo. Manko de fidindaj ciferecaj Esperanto-vortaroj estas grava malavantaĝo kompare kun la japana kaj la angla.
*La artikolon de Lutermano mi eksciis pere de la blogo de Ken Miner. Dankon!
Kato televidas
Lastatempe mia amata kato Bii lernis spekti televidon. Li interesiĝas precipe pri io moviĝanta en la ekrano. Tiaokaze li postsekvas la moviĝon per sia kapo same moviĝanta. Foje li etendas sian manon kaj tuŝas la objekton sur la ekrano. Verŝajne li volas kapti ĝin.
Jen li serioze rigardas rostatajn meretrikojn en la televido.
*meretriko: manĝebla konkulo bongusta [Meretrix lusoria].
Leganto de hajko
En kia okazo oni kortuŝiĝas, legante hajkon?
1. Tiam, kiam la hajko donas belan perspektivon.
2. Tiam, kiam la hajko donas novan vidmanieron pri kutima afero.
3. Tiam, kiam la leganto kunsentas emocion de la aŭtoro.
4. Tiam, kiam la leganto rimarkis kaŝitan/nediritan intencon de la aŭtoro.
Ĉiuokaze, leganto de hajko devas esti aktiva kaj diligenta.
Kovrita de flava sablo
Hodiaŭ estis nuba tago kaj matene iom pluvetis. Neordinare la atmosfero estis flaveta. Kaj eksterdome tegoloj, pavimoj, arbofolioj, aŭtoj ktp, ĉiuj estas kovirtaj maldense sed videble per fajnaj sableroj. Jen rigardu la antaŭglacon de mia aŭto.
Flava sablo alvenis transmare el Ĉinio. Laŭ televida raporto, la flava sablo kovris la tutan okcidentan Japanion. Pri la kaŭzo de flava sablo mi antaŭe skribis ĉi tie.
Kaspersky malpli malbone
Nun mi serĉas anstataŭanto de la kontraŭvirusa programo de Trendmajkro [Trend Micro], kiun mi uzas. La kialon mi jam skribis ĉi tie.
Hodiaŭ mi prove instalis provversion de kontraŭvirusa programo de Kasperski [Kaspersky]. Ĝenerale ĝi funkcias bone. Sed ankaŭ ĝi havas la problemon, ke la serĉado per Ĵamingo [Jamming] bezonas multe da sekundoj, Ĉi-okaze 3~4 sekundojn. Do duoble pli rapida ol tiu de Trendmajkro 2008. Tamen tio estas certe ja maloportuna.
Tulipoj ĝermas
Hodiaŭ komenciĝis marto. Estis sunoplena tago. Kvankam la maksimuma temperaturo estis 11,9 celsigradoj (do ne tiel alta), mi sentis varmeton sub la suno ekster domo.
Jarkomence mia edzino aĉetis kaj plantis bulbojn de tulipo. Ili jam ekĝermis en februaro. Ili kreskas iom post iom. Rigardante ilin, mi pensas, ke ankaŭ printempo kreskas iom post iom.
Veterprognozisto anoncas, ke morgaŭ la maksimuma temperaturo atingos 14 celsigradojn.
Kritikisto bezonata
Por ke la esperanta hajko fariĝu memstara ĝenro, ĝi bezonas kritikiston t.e. leganton, kiu kapablas aprezi ĝin kun artaj kriterioj. Ĝis nun malmultaj esperantistoj verkas hajkon. Sed nombro de jam verkitaj hajkoj estas sufiĉe granda almenaŭ por ion diri kritike pri la verkoj.
Mi atendas aperon de kritikisto pri hajko.