Hodiaŭ matene mi ne povis trovi la vendredan elsendon de Pola Radio en la retejo [http://www.polskieradio.pl/eo/]. Kaj vespere mi trovis la ŝokan artikolon de Libera Folio “Pola Radio haltigas la Esperanto-elsendojn” [ĉi tie]. Poste revizitinte la retejon de la Esperanto-redakcio de Pola Radio, mi trovis kaj aŭskultis la vendredan elsendon.
Laŭ la informoj la estraro de Pola Radio decidis, ke la unu sola redakciano de la Esperanto-redakcio ĉesigu la ordinarajn laborojn kaj prenu novan taskon por ŝanĝi la portalon de Pola Radio. Pro la decido la Esperanto-redakcio ne povos prepari aktualajn programerojn kaj elsendos arkivajn programerojn nur tri-tage (lunde, merkrede kaj vendrede) en la venontaj semajnoj. Oni ne certas, ĝis kiam daŭros la nova tasko. kaj oni ne certas, ĉu ŝi povos reveni al la kutimaj okupoj pri Esperanto-elsendo.
Do, estas necese, ke esperantistoj reagu al Pola Radio aŭ al polaj instancoj. Mi planas morgaŭ skribi retmesaĝon al la pola ambasado en Japanio [ĉi tie] pri tiu ĉi problemo.